BINTULU: Pekebun mit ba kandang menua Kakus nyengkaum Selangau diperansang nanam bemacham utai tanam enggau nyerungkai peluang baru ti ulih meri mayuh asil ngambi ngurangka empas rega utai tanam komoditi ti nurun.

Adun Kakus, Datuk John Sikie Tayai madah, pekebun ulih bepanggai ba pemansut utai tanam bukai enti sema rega asil komoditi baka sawit nurun rega.

Nya alai, dikena nangkup rega komoditi ti enda tetap, rayat kelebih agi pekebun mesti nanam bemacham utai tanam chara begulai ti bisi peminta tinggi sereta ngembuan makit ke manah,” terang iya.

Sikie mansutka jaku nya lebuh bejadika Pengawa Nutup Program Betanam Betupi Ngaul Komuniti (AgriCOP) di Rumah Tuggang, Sungai Arip, Selangau, ditu tadi.

Terang iya, ambika banding nanam sawit enggau nupi chapi tauka kambin mega meri untung besai lalu penatai pemisi sida mega ukai semina bepanggai ba asil sawit aja.

“Pengawa nupi chapi ba ladang ulih nagang rumput ari majak tumbuh enggau ngurangka ungkus meli rachun,” ku Sikie.

“Sama mega enggau pengawa nupi kelulut ti ulih mansutka mayuh asil beduduk ari rega madu kelulut diatu manggai beratus ringgit ungkup sekilogram.

“Pengawa nupi kelulut ulih dipegulai lebuh engkah log kelulut ba kebun buah tauka kebun nyiur laban kelulut nya ngeluarka rarak bungai kelimpah nambahka asil betanam,” terang iya silik agi.

Sikie nyemetak madah, pengawa betanam betupi nya sebagi ari chara perintah mantu nyungkak ekonomi rama kelebih agi ungkup peranak menua pesisir.

Ba pekara nya ku iya, bemacham bantu disediaka Perintah Gempung Parti Sarawak (GPS) nyengkaum Belanja Kereban Betanam Betupi (AFF).

Ba pengawa nya, John Sikie udah nyuaka Projek Mit Pemansang Menua Pesisir (MRP) penyampau RM24,000 ngagai Komiti Pemansang enggau Pengelikun Genturung Pendiau (JKKK) Rumah Tuggang.

Sama datai Pemesai Betanam Betupi Pelilih Selangau James Alow Bunya, Menijar Besai Gerempung Oramg Bumai SibuSengalang Jawan, Chairman KMKK Pelilih Tatau Pemancha Gerosen anak Jubin enggau  Penghulu Lasit anak Bajing.