KUCHING: Pemujur Perikatan Nasional (PN) di Sabah nyata nunjukka majoriti rayat Sabah bisi pengandal ngagai Tan Sri Muhyiddin Yassin nyadi Menteri Besai Malaysia.

Sapit Menteri Pengeluar Kuasa enggau Pengeraja Asal, Ali Biju madah, pekara tu enda ulih dikeenggai tang majak mandangka Muhyiddin siku ketuai ti nyulut ba mata rayat.

Ku iya, Menteri Besai kitai diterima rayat kelebih agi peranak menua pesisir ti naka penyiru ngangauka iya ‘Abah’, sempama baka anak ti meraya ba apai sida.

“Ulah Muhyiddin ti semampai betatika nasip rayat udah ngalahka umpan politik bukai ti deka manjuk undi rayat rambau Pengawa Bepilih Nengeri (PRN) Sabah tu tadi.

“Ari nya kitai sama berati, rayat udah sedar enggau jauh perening ba kuing politik menua, ngubah perintah nengah kuasa jari (undi) sida,” ku iya.

Ali mansutka penemu nya lebuh dirandau Suara Sarawak senentang pemutus PRN Sabah, kemari.

Iya madah, lebuh bisi kerejasama entara Perintah Nengeri enggau Perintah Besai, genap iku kitai deka bulih penguntung lalu rayat Sabah udah mantaika pengandal sida nengah undi.

“Kaul entara Putrajaya enggau Kota Kinabalu diatu lurus ke alai rayat Sabah ulih ngandalka Inisiatif pemansang ti lanchar laban nadai utai nekul agi.

“Nyadi siku ari peranak Malaysia Timur enggau orang asal ke diau di Pulau Borneo, aku ulih ngasai utai diasai orang Bumiputera menua pesisir di Sabah ti ngembuan juluk enggau pengandal ke sama.

“Genap menua udah dilawa aku baka sitak Dun Karanaan, Kundasang enggau Paginatan, semua tu dipegai sitak Parlimen Ranau, ke alai aku mendingka sada peminta enggau pengandal pengundi menua pesisir.

“Ku sida… YB, beri mih kami pemansang enggau ekonomi kebendar. Terang amat, sida ke diau ba menua ulu Sabah agi randakkan pemansang ekonomi enggau infrasturktur pemun,” terang iya.

Ali nyemetak madah, isu peranak menua luar datai nadai pemendar di Sabah mega udah nyadi isu besai ti patut diputar jampat.

Nya alai, kitai ti udah dilempai nyadi pengari rayat Bumiputera Malaysia Timur ba renggat Perintah Besai diatu patut ngesan tanggungpengawa besai agi, nyadi jematan nyambung rayat ngagai pemansang.

“Rayat udah meri mandat lalu kitai mesti gawa bebendar agi enggau nadai bechiping lebuh magi pemansang ngambika rayat enda lebu ngandalka kitai ngapa,” simpul Ali.