KUCHING: Pemutus Pengawa Bepilih Besai Nengeri (PRN) Sabah ukai pekara ti ngasuh kitai tekenyit.

Sapit Ketuai PBB Pampang Dun Satok Datuk Ibrahim Baki madahka, pemutus nya baka ti udah dijangka.

“Udah tentu bisi ‘menalan angat’ nyadi ba PRN nya tang pemutus udah dikeluarka enggau kitai meda Perikatan Nasional (PN) enggau Barisan Nasional (BN) menang,” ku iya.

Ibrahim bejaku munyi nya lebuh ditanya pemberita pengudah nyuaka kuih bulan beserimbai enggau Pengerami Kuih Bulan di SJKC Chung Hua No. 4 Jalai Nanas Barat ditu, kemari.

Tandu iya, Gempung Rayat Sabah (GRS) udah menang 38 penuduk ke alai nya majoriti ti manah.

“Ungkup numbuhka perintah, aku ngasaika sida patut nyiri tujuh agi penuduk dikena negapka perintah.

“Taja pia, sida udah menang PRN Sabah lalu deka numbuhka perintah,” ku iya.

Pemutus PRN Sabah nunjukka GRS udah menang 38 penuduk ngalahka Warisan Plus ti semina teulihka 32 penuduk.

Lebuh ditanya pasal pemutus RRN Sabah tau ngasuh pemutus Gempung Parti Sarawak (GPS) napi PRN Sarawak nandaka pemutus ti positif nyema pengawa nya diatur taun tu, Ibrahim madahka GPS bediri kediri sereta enda disengkaum dalam PN.

“GPS endang nyukung PN dalam numbuhka Perintah Besai menya, tang kitai ukai ba dalam sida.

“Nya alai, Perintah Besai disebut Perintah PN Plus GPS,” ku iya.

Nangkan nya, iya madahka isu bekaul enggau sapa ti deka nyadi Kepala Menteri Sabah deka diserahka ngagai menua nya empu.

“GPS semina nyaga Sarawak lalu kitai enda ngaul diri dalam pekara ti nyadi di Sabah…kitai mega nadai bekimpin ke sida din,” ku iya.