KUCHING: Perintah Sarawak naka ulih ngiga chara pemadu manah nyendiaka servis pengerai ti bisi kualiti ngagai rayat kelebih agi ba entigis (menua ulu).

Kepala Menteri Datuk Patinggi Abang Johari Tun Openg madah, Menteri Kaunsil Kandang Menua enggau Pengawa Berumah Datuk Seri Dr Sim Kui Hian udah dilempai tanggungpengawa mansik inisiatif ke patut dipejalai ungkup tuju nya.

“Kami bisi dua chara mutarka penanggul bekaul jalai penyambung iya nya nyeleti infrastruktur jalai alun ngambi mai pesakit ngagai sepital ti semak nya.

“Kebuah pia laban pelilih entigis ukai semina bepanggai ba perengka pengangkut langit laban nadai ulih dikena enti hari ujan.

“Siti agi kebuah aku deka nambahka semua infrastruktur digital tu ngambika kitai ulih ngena “telemedicine” ke alai bala lutur ulih meresa pengerai tang enda ibuh betemu enggau pesakit.

“Nya alai, Sarawak deka nyingkang ngagai inisiatif baru tu,” ku iya.

Abang Johari mansutka jaku nya rambau “Pagi Ahad bersama KM: Sesi Dialog bersama Usahawan Muda di Sarawak” ba sebuah hotel tebilang, ditu ensanus.

Taja pia ku iya, Sarawak napi penusah ketegal sektor pengerai di baruh bidang kuasa Perintah Besai.

“Baka ke ditemu kita, kitai begunaka belanja besai ba sektor pengerai dikena ngaga sepital lalu kami begunaka lutur enggau bala bukai.

“Nya kebuah, sepital bepanggai ba Perintah Besai enggau di baruh konstitusyen.

“Tang diatu kami berandau enggau Perintah Besai di baruh Sempekat Malaysia 1963 (MA63), kami nanya kebuah sektor pengerai dipasuk dalam Daftar Serentak ngambi nambahka servis pengerami kami,” terang iya silik agi.

Terang Abang Johari, sepital peribit diperansang nirika perengkaguna sida ba menua pesisir tang ungkur berubat kelalu mar.