LAWAS: Perintah Sarawak ngubah atur projek jalai alun Sabah, Sarawak Link Road (SSLR) ti diperambu Perintah Pakatan Harapan (PH) suba laban ngelimat belanja engggau jalai penyambung ngagai menua ulu.

Sapit Kepala Menteri Sarawak Datuk Amar Awang Tengah Ali Hassan madah, ubah nya udah disetuju Kepala Menteri Datuk Patinggi Abang Johari Tun Openg nyadi sebagi ari Projek Jalai Tebing Tasik Utara ari Sematan terus ngagai Lawas.

Ku iya, projek tu deka diubah ari sukut jalai penyambung baru.

“Abang Johari setuju ngubah jalai nya lalu deka dipegulai enggau perambu jalai tebing tasik ari Limbang enggau Lawas.

“Ubah baru nya jalai pandak agi lalu ungkus mega kurang enggau kitai ulih nyambung jalai ngelawa semua genturung pendiau enggau rumah panjai ba menua ulu,” terang Awang Tengah.

Awang Tengah mansutka jaku nya rambau Pengerami Ketuai Begulai enggau Rayat ba Kampung Punang, ditu tadi.

Awang Tengah ti mega Menteri Pemansang Mengeri enggau Pengeraja Asal Kedua madah, Abang Johari mega ngemendar agih belanja RM4 bilion ungkup bekal ai ba selampur Sarawak dipejalai ba timpuh dua taun.

Ku iya, Opis Bekal Ai Menua Pesisir (JBALB) deka nyambung paip deka ditukar ungkup timpuh pandak dikena mutarka penanggul bekal ai ba Kampung Punang enggau kandang menua bukai.

“Ungkup timpuh panjai, JBALB deka nyambung paip terus ari tangki ai beresi Gelugus ngagai Kampung Punang.

“Tangki ai tinggi mega deka digaga lalu diatu benung ditinda ngena agih belanja RM26 juta,” terang iya silik agi pasal bekal ai beresi.

Sama datai Kepala Menteri Sarawak Datuk Amar Dr Abang Johari Tun Openg enggau bini iya, Datuk Amar Juma’ani Tuanku Bujang, Sapit Menteri Pemansang Menua Pesisir Malaysia Datuk Henry Sum Agung, Sapit Menteri Perengka Pengangkut Hasbi Habibollah, Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail sereta bala bukai.