KUCHING: Asil produk kraf jari di Sarawak deka dikerembai ba palan eko-dagang temuai menua tu.
Menteri Dagang Temuai, Seni enggau Main Asal Malaysia (Motac), Datuk Sri Nancy Shukri madah, produk kraf jari di Sarawak majak dikelala bekau pemanah asil pengelandik jari nya empu.

“Nitihka ripot 30 Julai 2020, penyampau 1,036 orang dagang kraf di Sarawak tu udah ngerejister diri dibaruh Kraf Jari Malaysia ti ngaul raban pengereja penyampau 753 iku enggau 2,054 iku komuniti kraf.

“Asil bejual produk kraf di nengeri Sarawak udah mujur nyungkak penatai belanja manggai RM8.3 juta,” ku iya.

Nancy madah munyi nya lebuh meri licha ba pengawa Ngabas Kereja di Universiti Malaysia Sarawak (Unimas) ba Bilik Mesyuarat Utama, ensanus.

Nangkannya, Perintah Nengeri diatu benung chakah bejalaika pemansang dagang produk kraf ti ulih mandangka chura asil penatai asal ari menua Sarawak.

Nancy mega nandu, produk kraf nya mega ulih nyadi produk dagang, tepa ungkup bala temuai ti ulih nyadika pengingat ngagai sida pengudah nemuai ngagai Sarawak.

Berindik enggau nya, Nancy mega ngelalau awakka kitai semampai nyikap diri lebuh betapika ‘New Normal’ awakka industri dagang temuai dimenua tu semampai majak mansang kemua ti ulih nyungkak ekonomi menua.

“Aku arap enggau semua perambu udah diatur tu, ulih mulaika pemanah ba pengawa industri dagang temuai.

“Pia mega aku andal pengawa tu bulih sukung ti tegap enggau kerejasama penuh ari semua piak bekaul nyengkaum Gerempuang Ukai Dikuasa Perintah (NGO) enggau pedagang bukai,” ku iya nyemetak.