SELANGAU: Peranak 23 buah rumah panjai di Sapudun Balingian, Selangau deka ngasaika pemansang bekal karan 24 jam taun baru.

Kaban Kunsil Nengeri (ADUN) Tamin Ir Christopher Gira Sambang madah, projek nya beungkus RM7 juta dipelabaka tembu bulan Mach 2021.

“Projek tu digaga nengah Projek Bekal Karan Menua Pesisir (BELB) ti deka nentuka peranak 23 buah rumah panjai ditu bulih pemansang bekal karan 24 jam,” pia ku iya madah nengah Facebook iya sepengudah bejadika pengawa nasih tanah taba projek BELB nya ba Rumah Enjup di Tanjung Taroh, Balingian, kilah ensana.

Ba pengerami nya mega, Gira bela bejadika Projek Transformasyen Menua Pesisir (RTP) ngemanahka jalai batang Sapudun Tanung Taroh, Selangau.

Ku iya, projek jalai panjai 14 kilometer nya udah tembu nengah belanja RM1.2 juta.

“Aku mega ngarapka peranak menua tu meri kerejasama ngagai kontraktor ngambika projek BELB ulih digaga enggau nadai penanggul,” ku iya madah baru.

Maya pengerami nya, iya bela bisi nyuaka chek geran projek mit menua pesisir (MRP) RM150,000 ngagai beberapa buah Komiti Pengelikun enggau Pemansang Genturung Pendiau (JKKK) rumah panjai.

Sama bela datai Pemesai Opis Pelilih Selangau Inting Nyami.