KUCHING: Pemutus Pengawa Bepilih Nengeri (PRN) Sabah siti chunto ke manah ngagai rayat Sarawak.

Presiden Parti Rayat Sarawak (PRS) Tan Sri Datuk Amar Dr James Jemut Masing madah, rayat nengeri tu meseti ngetan hak nitihka Aum Malaysia 1963 (MA63) enggau Perlembagaan Persekutuan.

“Ari pemutus PRN Sabah, kitai di Sarawak patut beambi chunto alai kitai meseti ngetanka nama-nama hak kitai ba MA63 enggau Kunstitusyen Perintah Besai.

“Nadai lebih nadai kurang,” pia ku iya madah nengah penerang media, kemari.

Sapit Kepala Menteri tu mega madahka iya andal amat pengari rayat ke udah dipilih rayat Sabah ulih nyadi pengari ti ke bendar iya ngagai rayat sida.

Ku iya, pengelikun rayat menua nya patut dikemeratka dulu lebih agi maya pengerekai COVID-19 diatu.

“Aku ke nyadi presiden PRS ngenataika pengaga ati ngagai Gabungan Rakyat Sabah (GRS) ti udah menang ba pengawa bepilih tu.

“Diatu ngarapka pengari rayat GRS ngamatka semaya sida nitihka danji maya bekimpin sebedau tu,” ku iya madah baru.

Ba pemutus PRN Sabah Ke-16 malam ensana, GRS mujur nyadi parti perintah enggau majoriti 38 penuduk ari semua 73 penuduk Kunsil Nengeri (Dun) Sabah.

GRS diarika parti komponen Barisan Nasional (BN), Perikatan Nasional (PN) enggau Parti Bersatu Sabah (PBS) ngalahka Warisan Plus ti bulih 32 penuduk.

GRS menang enggau PN bulih 17 penuduk, BN (14) enggau PBS (tujuh).