KUCHING: Opis Pengerai Nengeri Sarawak (JPNS) udah bejalaika pengawa beperesa Covid-19 ba Palan Ngetan Imigresyen di Semuja, Serian enggau Bekenu, Miri.

Bisi 342 orang kena tan (OKT) udah diperesa ba Depo Semuja lalu 389 iku OKT enggau 53 iku pemesai udah diperesa ba Bekenu, Miri lalu semua nya ditemu negatif.

Nitihka penerang ari Komiti Penyangga Penusah Ngenyit Nengeri (JPBN) Sarawak, seharitu nadai kes baru positif Covid-19 ba Sarawak ngujungka kes positif mengkang 706 kes.

Pia mega, nadai kluster agi ngerekai ba Sarawak.

Siti kes baru udah suman enggau dikemendar pansut ari sepital seharitu.

Kes nya kes ti udah disidi ba Sarawak tang dipasuk ba Sepital Sungai Buloh, Selangor.

Tu ngujungka kes ti udah suman enggau dikemendar pansut ari sepital nambah ngagai 682 iku tauka 96.60 peratus .

Bisi lima kes agi diperubat ba wad isolasyen ke alai tiga ba Sepital Miri enggau bela siti ba Sepital Besai Sarawak (SGH) enggau Sepital Bintulu.

Siti kes diripotka ba Sandakan, Sabah benung diperubat ba Sepital Bintulu.

Kes pemati mengkang 19 iku tauka 2.69 peratus lalu dua PUI baru dirikod.

Naka seharitu mega, Pelilih Kuching enggau Pelilih Lawas mengkang ba status kuning ke alai Pelilih Lawas bisi tiga kes berampit menua lalu Pelilih Kuching bisi siti kes berampit menua diripotka ba timpuh 14 hari ke udah.

Tu ngujungka bisi dua pelilih mengkang ba status kuning enggau 38 pelilih bukai ba Sarawak mengkang ba status gadung.

Bisi tiga kes positif ti disidi ba Pelilih Lawas enggau 161 kaul udah diperesa enggau semua agi nganti pemutus makmal.