PENYIRU enggau penyelap ai kerangan ba Wong Kelansau nyadi pematak bala pengusung napatka palan memarin tu.

Tuai Rumah Serudin Ason, 65 taun, madah, Wong Kelansau tu kurang lebih 40 kilometer (km) tauka urung setengah jam pejalai ari pasar Saratok.

Endur tu endang suah ditapatka mensia mayuh ti rindu belepa enggau ngelantangka runding kelebih agi maya ujung minggu tauka pemisi sekula.

“Kebendar, ai wong tu ba Sungai Kabo iya nya entara Nanga Semambu enggau Nanga Lempa.

“Kitai ulih memarin ngagai ai wong tu nengah Jalai Awik terus ke Ulu Kabo lalu simpang tama urung 1 km ari rumah panjai kami di Semambu Ulu, Kabo.

CHELAP… Ai umbas penalam ba Wong Kelansau likun endur bala nembiak bemain.

“Ari simpang nya kitai deka bedarat nengah jalai babas kurang lebih 15 minit ngelawa ai wong tu,” ku iya ngelansa lebuh dirandau Suara Sarawak.

Iya madah, peninggi ai wong tu entara 10 ngagai 12 kaki ke alai bisi dua ringkat, bebatu enggau mayuh kayu Kelansau bebesai tumbuh ngelinggi endur nya. Ari pemayuh kayu Kelansau ke tumbuh dia alai ai wong tu dikangau Wong Kelansau.

Daun kayu Kelansau enggau bansa kayu kampung tuai ke bukai ti nya ngasuh menua dia lindap laban ayung ari panchar mata panas, kesuh angin mega berasai chelap endar.

Lubok ba kaki ai wong umbas penalam, kurang lebih lima ngagai tujuh kaki tauka naka tandan bau sida ke besai tuai enti bediri lalu likun endur bala nembiak bemain.

“Rantau kerangan chukup besai, manah alai bepanggangka utai empa lebuh memarin, makai serumpu bebala mayuh di tanah chukup ngerinduka ati.

PEMATAK MENUA KAMI… Wong Kelansa bisi rua ringkat enggau rantau kerangan endur memarin

“Ditu mega bisi sebuah langkau arau tang udah kelalu lama, nyau mayuh ramu udah repuk diempa indu sampuk.

“Langkau tu semina ulih endur kitai belalai enti sema hari ujan. Tambah mega, nadai orang dipadu ngintu langkau tu enggau meruan agi,” terang iya.

Nya alai Serudin ngarapka bisi piak ti siru enggau deka kiruh ngintu langkau enggau palan nya, abis nadai dikupas tiga bulan sekali ungkup pengelikun enggau pengelantang bala mayuh.

Kenu ku iya, enti sema endur nya diintu meruan ulih diangkat nyadi sebagi ari pematak dagang temuai di Saratok lalu tu deka nukangka pintu jereki ngagai peranak dia.

“Langkau ke bisi dia tau diseleti tauka nirika langkau baru ti disikap ngena perengkaguna ke patut, ulih digagaka rumah temuai tauka langkau endur bemalam.

LANTANG… Rantau kerangan chukup pemesai endur memarin bebala mayuh.

“Perambu ke bukai nya tau dikerandau dulu enggau peranak ke diau besemak baka kami serumah, nentuka pemansang dipejalai ila enda ngeruga pemanah rampa menua dia.

“Datai mih nemuai ngagai Wong Kelansau tu, kelebih agi maya ujung minggu, ulih rindang bemain sebelah ai, ngasuh runding lantang.

“Udah sekali kita mandi ditu asai enggai pulai. Ai chukup chiru. Ikan ti mit-mit bisi dipeda nyemerai ba sebelah selepak batu ti semampai ngasuh ati lelenggau,” ku ex-pengajar Serudin nampung randau.

Nambahka nya, bala ari Rumah Ganya, Nanga Lempa Kabo ditu mega kala ngatur pengawa miring ba Wong Kelansau dalam taun 2016 suba, dikena minta berekat enggau pengelikun.