KUCHING: Komiti Penyangga Penusah Ngenyit Nengeri Sarawak (JPBNS) udah ngelangkar strategi nyaga menua tu ari terus nerima kes import.

Chairman iya, Datuk Amar Douglas Uggah Embas madah, atur terit agi tama ke Sarawak deka dibantai pagila (1 Oktober).

Ku iya, atur tama kitu terit agi dipejalai ba Sarawak beduduk ari kes ke majak nambah ninting hari ba luar Sarawak.

Kemari, bisi empat kes baru positif Covid-19 ba Sarawak ke alai bela dua kes ba Pelilih Kuching enggau Pelilih Miri ngujungka kes positif Covid-19 ba Sarawak nambah ngagai 713 kes.

Uggah mega madahka semua kes nya dikategori kes import B laban datai ari luar Sarawak enggau nadai mantaika kelai kena rampit lalu pengawa nyidi kaul empat kes import B tu benung dipejalai.

Kes suman enggau udah pansut ari sepital mengkang 682 iku tauka 95.65 peratus laban nadai kes baru udah suman enggau pansut ari sepital.

Kes ti agi diperubat ba wad isolasyen nambah empat iku ngujungka naka kemari, bisi 12 iku agi diperubat iya nya empat kes ba SGH, lima kes ba Sepital Miri enggau siti kes ba Sepital Bintulu.

Bisi 14 PUI baru diripot enggau siti PUI agi nganti pemutus makmal enggau kes pemati mengkang 19 iku tauka 2.66 peratus.