MIRI: Siku lelaki bebadi nyawa kena tangkap karan lebuh benung nyuluk buah nyiur ba Kampung Pujut Padang Kerbau, Hari Tiga tu tadi.

Sapit Ketuai Polis Pelilih Miri, Superintenden Mohd Sabri Zainol madah, Syamsul Mohamad Yashin, 34 taun ditukuka parai tekala nya seraya bakih iya semina luput urung pukul 12 tengah hari.

“Sida niang sebilik madahka niang enggau dua iku agi bakih iya benung nyuluk buah nyiur ngena engkuar digaga ari besi panjai urung 15 meter.

“Ba endur nya, bisi siti tali karan bekuasa tinggi enggai tiga kabel ti enda diadu manah lalu pun nyiur enggau kabel nya penyauh urung 10 ngagai 13 meter,” ku iya nerang, ditu tadi.

Sabri mega madah, niang enggau bakih iya udah dibai ngagai Sepital Miri ungkup atur bukai.

“Bakih niang agi diperubat ba wad Unit Sakit Raya (ICU) enggau bedau ngeleda seraya siku nadai apa nama.

“Kes dikategori mati ngenyit (SDR),” terang iya.

Nitihka penerang, niang suah ngangkat buah nyiur ari pekebun ba kandang menua nya enggau nyuluk kediri deka dijual ba pasar.