KUCHING: Jalai Nanga Mujong enggau Nanga Sepanggil-Tunoh diatu benung digaga lalu nya kebuah jalai dia agi rusak, pia ku Sapit Kepala Menteri Tan Sri Datuk Amar James Jemut Masing.

Masing mansutka penerang nya ningkah jaku Presiden Parti Sarawak Bersatu (PSB) Datuk Seri Wong Soon Koh baka diripot dalam surat kabar China kena Hari Tiga tu tadi madahka jalai alun ba Baleh balat rusak taja Masing empu ke mega Adun Baleh nyadi Menteri Pemansang Infrastruktur enggau Palan Penyangkai Kapal.

Soon Koh ti mega ex-Menteri Wang II mejah Masing puntan bejalaika pemansang infrastruktur ba kandang menua iya.

Nya alai, Masing ti mega Presiden Parti Rakyat Sarawak (PRS) madah, manggai RM3 bilion udah diagih ungkup pemansang infrastruktur ba Baleh mungkur lima projek jalai alun.

“Jalai Nanga Mujong sepanjai 73 kilometer (km) (Jalai tama ngagai Tekat Ai Baleh ti diperambu) beungkus RM1.2 bilion enggau Nanga Sepanggil-Tunoh (jalai tama ngagai Tunoh) beungkus RM600 juta benung digaga.

“Jalai Rh Nyamok / Nanga Serau / Nanga Gaat / SMK Baleh / Sungai Kain beungkus RM380 juta mega deka dipejalai ba dua renggat diperambu digaga ujung taun tu,” ku iya nerang, ditu kemari.

Ku iya, jalai nuju Tunoh (Nanga Mujong / Nanga Tiau / Tunoh) dipelaba beungkus RM550 juta nya udah dikemendar di baruh Langgur Pemansang Malaysia Lumpar Ke-12 (RMK-12).

Pia mega ku iya, Jematan Batang Baleh, Jematan Sungai Mujong enggau Jematan Sungai Bunyau ti beungkus RM123 juta nya udah tembu seraya Jematan Sungai Merirai beungkus RM3.9 juta benung digaga.

“Aku udah mujur mai pemansang infrastruktur beungkus bebilion ringgit ngagai Baleh lalu tu ngayanka Perintah Gempung Parti Sarawak (GPS) keran ngemansangka kandang menua pesisir,” ku iya.

Masing disempulang bala bukai rambau pengawa nasih tanah ba Jalai Rumah Nyamok-Sungai Kain.