KUCHING: Perambu Serakup Komuniti Pasar Lama Kuching (Komca) ngidupka baru Bazar Lama Kuching deka nempa palan nya nyadi produk pesaka dagang temuai ba Sarawak.

Menteri Dagang Temuai, Seni enggau Main Asal, Datuk Abdul Karim Rahman Hamzah madah, perambu tu deka dipejalai nengah Kuching Old Bazaar: Culture Mapping and Tourism Promotion Programme.

“Nya perambu keterubah iya dibantai piak Komca ngagai opis menteri ba bulan April taun nyin kemari enggau besilih penemu pasal dagang temuai enggau pesaka Bazar Lama Kuching.

“Pengudah pengawa ngelanchar seharitu (1 Oktober), kami deka nampung pengawa tu lalu ngarapka program tu mansutka asil lima bulan agi.

“Kami mega deka ngelanchar Bazar Lama Kuching maya Chap Goh Mei ba bulan Februari 2021 tu ila,” terang iya.

Karim mansutka jaku nya ba aum pemberita Kuching Old Bazaar: Culture Mapping and Tourism Promotion Programme di Harmony Arch, Lebuh Carpenter, ditu kemari.

Nambahka nya ku iya, entara tuju program tu iya nya nusun baru pesaka menua baka ngerikod sejarah ditusi peranak, ngempung penerang enggau ke bukai.

“Program tu ngaul komuniti, pedagang, gerempung pedagang, orang tuai ba pelilih tu, surat kabar lama enggau penerang ari jeman Brooke.

“Pansik tu deka dipejalai enggau kerejasama mansik, pakar sejarah enggau university tebilang ba Sarawak,” terang iya.

Iya mega madah, program tu deka ngaga nama baru ungkup Kuching dikumbai Bazar Lama Kuching (Kuching Old Bazaar) lalu ngarapka palan tu seikas Chinatown Singapore, Georgetown Pulau Pinang enggau Jonker Walk Melaka.
“Bepun ari taun siti tu ila, opis menteri deka mantaika Goddess Parades ari dua tepikong ba kandang menua tu iya nya Tepikong Hiang Thian Siang Ti enggau Hong San Si.

“Tu nyengkaum ngatur mayuh agi program dagang temuai pesaka ninting taun kelimpah ari Festival Kuih Bulan enggau ke bukai,” ku iya.

Ungkup rikod, Bazar Lama Kuching nya entara palan dagang keterubah ba Sarawak ke ngembuan sejarah lebih ari 100 taun.

Pia mega, urung 200 rumah kedai asal ngelingi Bazar Utama ke Utara iya nya Jalai Haji Openg di Barat, Jalai Green Hill di Timur enggau Sekula St Mary nandaka adan selatan.

Sama datai Sekretari Mendam Opis Menteri Dagang Temuai, Seni enggau Main Asal Hii Chang Kee, Presiden Komca Kapitan Lim Chuan Chan, ex-Datuk Bandar Dewan Bandaraya Kuching Selatan (MBKS) Datuk James Chan, Presiden  Serakup Besai Bansa China Sarawak Datuk Richard Wee enggau Sapit Presiden Parti Sa’ati Rayat Sarawak (SUPP)  Datuk Lily Yong.