KUCHING: Gempung Parti Sarawak (GPS) enda bechuamka Pengawa Bepilih Nengeri (PRN) Sabah ngambi sedia napi PRN Sarawak ke deka diatur sebarang maya.

Nya alai, Kepala Menteri Datuk Patinggi Abang Johari Tun Openg madah, pekara nya nadai dikerandau lebuh betemu enggau ketuai GPS ensanus.

“Enda, Sabah nadai kaul enggau kitai lalu nadai utai dipelajar kitai ari Sabah,” ku Abang Johari.

Abang Johari mansutka jaku nya lebuh ditanya pasal randau enggau ketuai GPS pengudah bejadika Hari Pedagang Mikro Pengelantang Sarawak (HUMKS) 2020 ba sebuah hotel tebilang, ditu ensanus.

Pia mega, Abang Johari madahka isu Anwar Ibrahim mega nadai dikerandau rambau betemu enggau ketuai GPS.

Tang ku Chairman GPS ti mega Presiden Parti Pesaka Bumiputera Bersatu (PBB) madahka randau nya semina aum baka selama.

Apin lama, Anwar udah madahka diri bulih sukung majoriti ari Kaban Parlimen kelimpah ulih numbuhka perintah baru.

Nambahka nya, Presiden PKR nya mega madahka diri bulih sukung ari Kaban Parlimen GPS.

Taja pia, Abang Johari nyengkaum Sekretari Besai GPS Datuk Alexander Nanta Linggi enggau Ketuai Whip GPS Datuk Seri Fadillah Yusof mega mantah penemu nya.

Sida nyemetak madah, GPS mengkang bekerejasama enggau Perikatan Nasional (PN) sereta nyukung Tan Sri Muhyiddin Yassin nyadi Menteri Besai.