MIRI: Raban bansa Penan diatu majak sedarka pemesai guna pelajar
Adun Telang Usan, Dennis Ngau mega madahka raban bansa Penan diatu udah sedar mesti mansang begulai enggau raban bansa bukai ba menua tu ungkup pemaik dudi hari.

“Orang Penan udah maju ari bidang pelajar lebuh bisi 252 iku nembiak mujur nampung pelajar tinggi ari raban minoriti tu.

“Ba pun taun 80-an, nadai siku bansa Penan besekula nyentuk Pom Lima, enti bisi pan siku tauka dua iku kelebih agi nampung pelajar ngagai renggat Degree tauka PhD.

“Kebuah pia laban lebuh nya pengidup sida chukup merinsa laban bansa Penan agi diau jauh ba kampung.

“Kelimpah ari nya, bansa Penan ngembuan runding ke bebida pasal pekara pelajar tu,” terang Dennis.

Dennis mansutka jaku nya ba Pengawa Nyuaka Bantu Pelajar enggau Sekularship Serakup Pemansang Tipun Penan (Petipun), Hari Enam tu tadi.

Ku iya, apai indai enggau bala anak suba enda meretika pemesai guna pelajar.

Tang ku iya, runding nya udah berubah laban diatu makin mayuh bansa Penan meretika pekara pelajar nya kunchi bulih pengidup ke menyana dudi hari.

Nambahka nya, Dennis ngelalau bansa Penan anang pedis ati enggau pengawa dikereja gerempung ukai dikuasa perintah (NGO) ti berundingka diri aja laban serakup sida nadai ngenataika sebarang pemanah.

Sama datai ba pengawa tu iya nya Presiden Petipun, Temenggong Datuk Hasan Sui.

Hasan madah, Petipun ngerikod 155,87 iku graduet dalam komuniti kenyau ari taun 1998.

Iya mega madah, bisi tujuh enggau tiga iku udah tembu tauka agi nampung pelajar ba renggat Degree, Diploma, Master enggau PhD.

“Ari 20,000 orang Penan ba Sarawak, lebih 250 iku ari sida nya udah mujur nyadi graduet.

“Nya mih penyulut ke dikemegah kitai lalu aku ngarapka raban bansa bukai ulih nunda raban bansa Penan ari sukut pekara pelajar,” ku iya nerang silik.

Hasan mega ngelalau rayat seruran nyukung Gempung Parti Sarawak (GPS) enggau Adun Telang Usan ti udah bebendar gawa mai buah pemansang ngagai komuniti Penan.

Ba pengawa nya, bisi 25 iku bansa Penan nerima bantu sekularship ari Petipun iya nya dua iku bulih PhD, siku BULIH Degree, tujuh iku bulih Master enggau enam iku bulih Diploma.