KUCHING: Pengawa ngangkatka literasi sains dikeandal ulih meri peluang ngagai komuniti Sarawak bulih pemaik ba sukut teknologi enggau inovasyen.

Kepala Menteri Datuk Patinggi Abang Johari Tun Openg madah, produk sains enggau teknologi deka ngangkatka sukut kaul sosial kelimpah ulih mutarka penanggul dalam menua.

“Ambika chunto, lebuh kitai betapi enggau igi penyakit Covid-19, dia kitai meda teknologi tu beguna amat ti ulih mutarka penanggul lebuh bejalaika sebarang pengawa. Nya alai perintah deka numbuhka Palan Sains Sarawak (PSS) ungkup pemaik rayat di menua tu, “ku iya.

Nangkan nya iya madah perintah deka chakah ngelakuka pelajar sains awakka ulih ngemansang rayat Sarawak nemu bekaul konsep sains.

Berindik enggau nya, sains tu mega deka ngemansang chara runding rayat Sarawak ungkup nemu bakani deka mutarka sesebengkah isu ti nyadi.

“Nya deka mantu mensia mayuh ti deka mutarka penanggul ti nyadi enggau chara ti manah,”ku iya nyemetak maya pengawa Nasih Tanah Palan Sains Sarawak di Jalai Stadium, Petrajaya kemari.

Berebak enggau nya, kebuah perintah numbuhka Pusat Sains tu laban Sarawak sebuah nengeri ngembuan mayuh sumber penatai asal ungkup meri pemansang peranak Sarawak kelimpah ngembuan peranak ti mimit,ku tandu iya.

Semua sukut pemansang ekonomi jemah deka bepelasarka bakani teknologi tu ulih nyungkak pemansang menua.

Palan Sains Sarawak deka ulih nambahka peneleba peranak Sarwak ba sukut pelajar sains enggau teknologi jemah.

Palan Sains Sarawak mega siti pemansang ti beguna ungkup Sarawak ti deka mantu nembiak Sarawak majak rinduka bidang Sains, Teknologi, Injinir enggau Matematik tauka STEM.

Sama datai Menteri Pelajar Sains enggau Pansik Teknologi Datuk Seri Michael Manyin Jawong, Menteri Utiliti Datuk Seri Dr Stephen Rundi Utom sereta Menteri Pengawa Berumah enggau Kaunsil Kandang Menua Datuk Seri Dr Sim Kui Hian.