KUCHING: Sarawak nutup pintu penama ba garis entara menua nyentuk 3 Disember beduduk ari kes Covid-19 di menua tu niki baru.

Kelimpah nya dalam timpuh ti sebaka iya nya palan penyangkai kapal ti bekaul enggau menua Indonesia enggau Filipina mega ditutup.

Sapit Kepala Menteri ti mega Chairman Komiti Garis Entara Menua Tan Sri Datuk Amar (Dr) James Jemut Masing madahka Sarawak nadai jalai bukai ngaga atur ti terit dikena ngelindung rayat ari Covid-19.

“Kami (Komiti Garis Entara) udah madahka ngagai Komiti Penyangga Penusah Ngenyit Nengeri (JPBN) ngambika terus neritka Atur Pengawa Standard (SOP) ngagai temuai ari Sabah enggau Semenanjung Malaysia.

“Chara tu mesti digaga laban gelumbang baru Covid-19 nyangka deka nyerang menua kitai,” ku iya dalam penerang media seharitu.

Iya mega ngelalu minta atur ti terit mesti dipejalai ba palan endur gawa baka palan ti ngembuan mayuh pekereja menua luar.

“Diatu Sarawak nyau deka punas ari penyakit nya, tang kitai irauka pengerekai penyakit tu deka nyadi baru nyema kitai enda ngadang baka ngaga atur ti terit ngelaban iya.

“Manah agi kitai neritka atur nyeliah ti terit ari kitai nesal dudi hari,” ku iya.