KUCHING: Semua kedai ti bejalaika pengawa dagang dilalau milih siti aplikasyen digital ungkup ngerijister orang ti datai ngagai kedai kelimpah nulis nama ba bup rikod.

Nitihka penerang Kaunsil Mengeri Padawan (MPP), aplikasyen baka My Sejahtera, Qumunity enggau Covid Trace entara aplikasyen ti ulih dikena ungkup nyidi pengerekai igi penyakit Covid-19 dalam menua.

“Aplikasyen tu mega ulih mantu Menteri Pengerai Malaysia (KKM) ngulihka penerang sida ti bisi kaul enggau orang ti kena rampit Covid-19,”ku penerang nya tadi.

Nangkan nya, raban bejalaika pengawa dagang pemakai mega dilalau ngerendam sudu, garpu enggau ‘chop stick’ dalam ai angat sebedau perengka nya ulih dikena bala penguna dikena munuh bakteri tauka virus.

“Tu meh siti atur lisin ngagai sesebuah kedai makai enggau sida deka diukum nyengkaum ngetuka lisin sida enti enda ngasika atur nya,” ku tandu penerang nya.

Nya alai, raban pedagang ba kandang di pegai Kaunsil Mengeri Padawan (MPP) dilalau nitihka semua atur tauka Atur Pengawa Standard (SOP) ti dipansutka perintah ti deka ngemunaska pengerekai igi penyakit Covid-19.