LONG LAMA: Kaban Kunsil Nengeri (Adun) Telang Usan, Dennis Ngau meri besai terima kasih ngagai Gerup Serikat Samling laban seruran mantu komuniti ba kandang menua iya nengah Program Tanggungpengawa Rama Korporat (CSR).

“Taja ngembuan tanggungpengawa besai, Serikat Samling seruran datai mantu lebuh kami kelebih agi tuai rumah minta saup,” ku iya.

Iya madah munyi nya pengudah piak Samling nyeleti baru jalai ke merekah ba Telang Usan ketegal ujan bangat beberapa hari ke udah.

“Aku meri besai terima kasih ngagai piak Samling laban udah nyeleti jalai ti suah ditengah komuniti ba kandang menua tu,” ku Dennis.

Ku Dennis, projek pemansang ke mayuh dipejalai perintah ba Telang Usan tu ngujungka mayuh entukar berat betengahka jalai kelimpah jalai dia balat rusak ketegal deriba entukar nya enda nemu deriba ba jalai batang lebuh hari ujan.

“Entukar berat enggau treler ti mekang ba jalai tu ngenataika penusah besai ngagai entukar bukai ti bepanggai ba perengka pengangkut mensia mayuh enggau entukar 4WD mindah ke bukai tauka ngangkut barang sida.

Kelimpah ari nya, Dennis ngelalau pengempu entukar berat enggau deriba entukar nya anang nengah jalai tu maya hari ujan.