KOTA SAMARAHAN: Unimas ngambi pemutus nyekat dulu penatai semua nembiak baru tekala nya nyentukka hari bulan ti deka dipadah baru.

Mandal Chanselor Unimas Prof Datuk Dr Mohmad Kadim Suaidi madahka, taja pia, nembiak ti udah diau ba kampus dikemendarka diau dia tang dilalau nyaga diri ari pengerekai igi penyakit Covid-19.

“Pejalai tama ngagai kampus ditangguhka dulu nyentukka pengerekai igi penyakit Covid-19 badu enggau nitihka gerah ti dikeluarka Kaunsil Pengelikun Menua (MKN) sereta Komiti Penyangga Penusah Ngenyit Nengeri (JPBN).

“Pengawa rejister semua nembiak baru enggau nembiak lama bagi semester 1, renggat 2020/2021 deka diatur chara online nengah laman web Unimas,” ku iya madah ngagai Suara Sarawak, kemari.

Kenu ku Kadim, nembiak baru Minggu Aluan Pelajar (MAP) ti deka dipejalai kena 8 ngagai 10 Oktober enggau Pengerami Ikrar Pelajar deka diatur kena 11 Oktober.

“Semua program tu diatur dalam online. Bagi aktiviti ngajar enggau belajar (PDP), semua nembiak dipinta betelefon ngagai fakulti diri empu bekaul pekara nya (chara betemu mua tauka dalam online).

“PDP deka bepun dalam online kena 12 Oktober lalu chara belajar betemu mua deka diatur kena 2 November,” ku iya.

Iya nandu, nembiak ari Semenanjung Malaysia ti deka tama ke Sarawak mesti bejalaika kuarantin 14 hari ba Palan Kuarantin ti udah ditetapka JPBN.

“Peresa Covid-19 diambi ba hari ti kedua enggau kesepuluh lalu ungkus peresa nya ditanggung nembiak nya empu.

“Kelimpah ari nya, semua nembiak ari Sabah enggau Labuan enda dikemendarka tama ke Sarawak bepun 4 ngagai 18 Oktober 2020,” ku iya.

Sapa bisi pekara deka ditanya pasal pekara tu tau betelefon ngagai Palan Servis Pelajar ba lumur 082-581921/082-581857/082-581858.

Kadim madahka, pengawa nya digaga sida ketegal kes positif Covid-19 ba menua tu bisi niki, pia mega JPBN bisi neritka atur tama rayat menua enggau ukai rayat menua ngagai Sarawak bepun Hari Minggu tu ila.