KUCHING: Serba Dinamik Holdings Berhad deka ngerembaika Program Tanggungpengawa Rama Korporat (CSR) di baruh kimpin ‘Serba Care Team’ renggat dunya ti beratka aktiviti pengelikun enggau pengerai, pekara pelajar enggau rampa menua ungkup pengelantang.

Ketuai Direktor Eksekutif Gerup Serba Dinamik Holding Berhad, Datuk Dr Mohd Abdul Karim Abdullah madah, serikat tu deka bejalaika tiga aktiviti nya ngambika komuniti idup lantang enggau gaya idup baru.

Ku Abdul Karim, pengelantang nya seruran nyadi agenda serikat seriris enggau juluk nangkup peminta nyungkak ekonomi kelimpah nyaga rampa menua.

“Tu mih tuju kami meri peransang dalam asil dagang enggau nentuka serikat tu meri empas positif ngagai semua piak bekaul.

“Bepelasarka tiga aktiviti nya, kitai mesti ransing ngerembaika pengawa nengah program tu ungkup pemansang rebak dudi,” ku iya meri penerang.

SERURAN MANTU… Gerup Serba Dinamik udah nyuaka bekal perubat ngagai Republik Guinea dikena nagang pengerekai Covid-19.

Nambahka nya ku iya, ba pekara pelajar, serikat nya udah ngelanchar aktiviti ngambi negapka Raban Nyaga ungkup pengereja sida nitihka aktiviti akademik ti benung diatur.

Ungkup gerup taun 2019, tiga iku nembiak dipilih enggau ba taun 2020, bisi 13 iku nembiak dipilih ba program nya.
Terang Abdul Karim, mayuh agi aktiviti dilanggur ngambi ulih mansang enggau kerejasama Sekularship Yayasan Mara dalam program sekula angkat ba kandang menua pesisir.

Berebak enggau nya, Abdul Karim madahka Raban Serba Dinamik Care udah ngatur aktiviti sida ngagai komuniti menua baka ba Bintulu, Miri, Pakan, Labuan, Kuala Lumpur enggau Indonesia.

Sida mega udah nyadung sebagi ari pemeri ngagai institusyen sukung baka rumah anak patu balu enggau gerempung ukai dikuasa perintah (NGO).

Kenyau ari 20 taun ke udah, Serba Dinamik Holdings Berhad nengah anak serikat diempu Serba Dinamik International Ltd (SDIL), udah nempa kaul rat enggau Afrika Barat mantaika tanda basa enggau asai temegah sentang adat menua nya nengah inisiatif tu.

Ba renggat keterubah kimpin ‘Serba Cares’ renggat dunya udah nyukung Republik Guinea enggau Republik Senegal lebuh nyendiaka lebih 20,000 iti kereban nyaga diri, bekal ubat, sengkabung mua enggau termometer inframerah manggaiRM1 juta.

Serba Dinamik udah mantu peranak asal Afrika Selatan ngambi meransang kimpin ngupas kandang menua ngambi likun enggau bepengerai ungkup peranak Senegal enggau Guinea.

“Serba Care mega fokus ngagai komuniti lebuh nagang pengerekai igi penyakit kelimpah nyapai pemansang menua ke meruan agi,” terang Dato Karim.

Syarikat udah ngepunka kerejasama strategik enggau Bank Pemansang Islam bepalan di Jeddah ngambi ngasilka bekal ubat nyadi sebagi ari program gerup CSR Serba Care nagang pengerekai Covid-19.

Sebedau tu, Serba Dinamik udah nyuaka bantu manggai RM1.5 ungkup program CSR lebuh nyendiaka kereban nyaga diri enggau bekal perubat bukai ngagai beberapa buah sepital di Malaysia kenyau ari 28 March dikena nagang pengerekai Covid-19 nyengkaum Palan Perubat Universiti Malaya (PPUM), Sepital Chanselor Tuanku Muhriz (HUKM), Sepital Serdang, Sepital Selayang, enggau Sepital Sungai Buloh.

Serba Dinamik mega meri sukung enggau bantu ngenyit ngagai ruang bilik enggau orang tusah kelebih agi komuniti B40 ba Sarawak.