KUCHING: Perintah Sarawak deka meri fokus ngagai pengawa ngerembaika pelajar sains enggau teknologi ngambi ulih nempa nembiak ti kreatif, inovatif sereta ulih besemekih nengah penumbuh Palan Sains Sarawak.

Menteri Pelajar Sains enggau Pansik Teknologi, Datuk Micheal Manyin Jawong madah, objektif penumbuh pusat nya deka nyediaka pelajar ti pintar kelimpah ulih matak minat, penau enggau semangat nembiak, pengajar sereta komuniti ti deka nemu bekaul sains enggau teknologi.

“Nya alai kitai numbuhka palan sains tu awakka nyendiaka mayuh perengkaguna ungkup komuniti Sarawak bekaul sains enggau teknologi.

“Aku mega ulih ngasai palan tu deka bekerejasama enggau sekula ungkup ngerembaika peneleba pemun ti deka nemu kaul STEM nengah program formal tauka enda formal,” ku iya.

Manyin madah munyi nya lebuh meri licha beserimbai enggau pengawa Nasih Tanah Pusat Sains Sarawak di Petrajaya, kemari.

Nangkan nya iya madah pusat tu deka nyadi pelasar Sarawak ti deka ngemansangka rayat ti ulih nyungkak teknologi seriris enggau revolusyen industri.

Palan Sains Sarawak tu deka nyediaka pelajar tauka komuniti ti bepenemu nengah sains enggau teknologi enggau lebih chakah. .

“Program ti disediaka ba pusat tu mega ulih ngelengkapka aktiviti kokurikulum sains sekula ti belajarka kaul sains enggau teknologi nengah projek mini pelajar.
“Palan tu mega nyediaka peluang kereja ukai aja ungkup graduet enggau professional bepelasarka sains tang ungkup sida lepas sekula tauka udah pinchin mega ulih nyambung pengawa nyadi volunteer sains, “ku iya nyemetak.

Berebak enggau nya, Manyin madah ba sistem pelajar Sarawak ungkup subjek Sains enggau Matematik ba sekula primari deka ngena Bahasa Inggeris bepun taun 2021.

“Sarawak meh sebuah nengeri ti keterubah ngena Jaku English ba kedua subjek nya.

“Pengawa ngena jaku English tu beguna amat laban ulih meri awak ti besai ungkup anak Sarawak kelimpah ba sukut sains enggau teknologi,” ku iya.