KUCHING: Sarawak deka nyadi sebuah menua ngasilka gelas ti bekualiti ti digaga ari pasir silika, ku Kepala Menteri Datuk Patinggi Abang Johari Tun Openg.

Abang Johari madah, Sarawak ngembuan pasir silika ari Bintulu nya chukup berega laban ulih dikena sarikat ari Jipun begagaka gelas ti bekualiti.

“Tu pengudah aku nemuai ngagai Jipun lebuh nyadi Menteri Industri suba, dia aku meda Jipun ulih ngasilka gelas ti bekualiti lalu aku nanya dini sida bulih kereban kena ngaga gelas nya.

“Aku bulih timbal ari sida, Jipun bulih pasir silika nya ari Borneo iya nya di Bintulu, Sarawak,” ku iya.
Nya alai, perintah Sarawak deka ngurangka eksport pasir silika ngagai menua Jipun laban deka mai teknologi ti ulih ngasilka gelas ti bekualiti di Sarawak aja, ku tandu iya.

“Enti kitai bisi ngembuan pakar sains ti ulih ngaduka pasir silika kitai, Sarawak mega deka ulih ngasilka gelas ti bekualiti digaga ari Sarawak tang ukai di Jipun,” ku iya.

Abang Johari madah munyi nya lebuh meri licha berserimbai enggau pengawa Nasih Tanah Palan Sains Sarawak di Jalan Stadium, Petrajaya, ensanus.

Nangkan nya iya madah Sarawak mega deka bejalaika pengawa nanam asil bumi ngena teknologi baru.
Kenu ku iya, Sarawak ngembuan potensyen ti besai ulih ngemansutka asil tanam ari babas kelimpah ulih ngasilka ubat ari menua Sarawak.

“Ti sema kitai bisi ngembuan saintis ti bepengelandik, aku andal kitai mega ulih ngasilka siti ubat kena ngemunaska igi penyakit Covid-19.

“Nya alai kitai deka ngemansangka tikas pelajar kitai ti ulih mai pemaik ngagai menua Sarawak,” ku iya enggau silik.
Sama datai Menteri Pelajar Sains enggau Pansik Teknologi, Datuk Seri Micheal Manyin Jawong, Menteri Utiliti, Datuk Seri Dr Stephen Rundi Utom sereta Menteri Pengawa Berumah enggau Kaunsil Kandang Menua, Datuk Seri Dr Sim Kui Hian.