KUCHING: Komiti Penyangga Penusah Ngenyit Nengeri (JPBN) Sarawak udah ngelangkar strategi dikena nyaga menua ari majak kena rampit kes import penyakit Covid-19 ari luar Sarawak.

Chairman iya, Datuk Amar Douglas Uggah Embas madah, semua peranak Malaysia enggau peranak luar ti diau ba Sabah enggau Labuan enda dikemendar tama kitu bepun 4 ngagai 18 Oktober tu.

Ku Uggah, rayat Sarawak ti diau ba Sabah enggau Labuan dikemendar pulai tang mesti ngisi pom nengah aplikasyen EnterSarawak enggau ngisi Pom Ngenukuka Pengerai Diri (e-Health Declaration Form).

Sida mega deka dikuarantin ba palan kuarantin pengelama 14 hari enggau beperesa rT-PCR ba hari kedua enggau ke-10 sereta ungkus kuarantin enggau beperesa nya ditanggung Perintah Sarawak.

Ungkup pengereja ba sektor minyak enggau gis, sida mengkang nitihka Atur Pengawa Standard (SOP) ke bisi diatu.
Ungkup sektor dikategori servis bekaul nyengkaum servis nganjung barang ti ngena jalai darat, sida mesti minta Surat Khas ari Komiti Penyangga Penusah Ngenyit Bagi Menua ti bekaul (Miri tauka Limbang) lalu enda tau enda beperesa rT-PCR sebedau berengkah gawa enggau ba hari ke-14.

Pia mega ku Uggah, sida ti nengah menua Brunei, mesti nitihka semua atur baru ti udah dikeluarka Perintah Brunei empu.

Terang iya, semua peranak Malaysia enggau peranak luar ti deka tama ke Sarawak ari Semenanjung Malaysia mesti ngisi pom nengah nengah aplikasyen EnterSarawak enggau ngisi Pom Ngenukuka Pengerai Diri (e-Health Declaration Form) bepun 4 ngagai 18 Oktober tu.

Sida mega deka dikuarantin ba palan kuarantin pengelama 14 hari enggau beperesa rT-PCR ba hari kedua enggau ke sepuluh sereta ungkus kuarantin enggau beperesa nya ditanggung Perintah Sarawak.

Bekaul servis bekaul (ukai rayat Sarawak) ti bejalaika pangku pengawa rasmi ba Sarawak, sida mesti ngisi pom nengah nengah aplikasyen EnterSarawak enggau ngisi Pom Ngenukuka Pengerai Diri (e-Health Declaration Form) lalu enda tau enda beperesa rT-PCR tiga hari sebedau terebai.

Rayat Sarawak ti diau ba Semenanjung Malaysia dikemendar pulai tang mesti ngisi pom nengah nengah aplikasyen EnterSarawak enggau ngisi Pom Ngenukuka Pengerai Diri (e-Health Declaration Form) sereta dilekat gelang jari enggau dikuarantin pengelama 14 hari.

Udah nya ku iya, sida deka beperesa rT-PCR ba hari kedua lalu nyambung baru timpuh kuarantin ba rumah enti pemutus nya negatif.

Terang Uggah, sida mega deka diasuh ke Klinik Pengerai besemak ngambi beperesa baru ba hari ke sepuluh lalu ungkus kuarantin enggau beperesa nya deka ditanggung Perintah Sarawak.

Nambahka nya ku iya, ungkup rayat Sarawak ti dikategori dalam servis bekaul enggau mesti bejalaika pangku pengawa rasmi ba Semenanjung, sida mesti ngisi pom nengah nengah aplikasyen EnterSarawak enggau ngisi Pom Ngenukuka Pengerai Diri (e-Health Declaration Form).

Sida mega enda tau enda minta pemendar ari ketuai opis lalu nganjung surat rasmi sereta surat dikangau ngagai aum ba aplikasyen Entersarawak sebedau dikemendar pulai lalu nadai dikuarantin.

Sida deka diperesa ‘swab’ enggau dilekat gelang jari sereta diasuh kuarantin ba rumah dataika pemutus nya negatif.
Iya mega madah, sida ulih nganjung pemutus negatif nya dalam aplikasyen Entersarawak sereta surat rasmi surat dikangau ngagai aum ba aplikasyen Entersarawak sebedau dikemendar pulai lalu nadai dikuarantin enti rT-PCR nya negatif.

Berebak enggau nya, Uggah madahka sida ari menua luar ti deka tama kitu mengkang nitihka SOP ti udah ditetapka sebedau tu.