SARAWAK puntan masuk pekit berebutka Mangkuk Malaysia 2020.

Tu beduduk ari pemutus alah nyatup Terengganu FC II 1-0 di Stadium Negeri, Petra Jaya malam ensana.
Gol tunggal dipasukka pemain import Terengganu FC II, Jordan Mintah minit ke-6 terus nutup peluang bala pemain Sarawak ke dibaruh iring E.Elavarasan ngining pekit nya.

Taja main nya digembar enggau ujan bangat tang asil perati penuh bala pemain Sarawak ke mayuh agi nguasa bol sepanjai main.

“Amat asa enggau main ke udah alah malam nya, diperati pemain penyerang kitai chukup tumpul sepanjai timpuh 90 minit.

“Uji perati, mayuh peluang bisi ayan tang puntan ngemasukka gol ngagai mua pintu gol orang,” ku Presiden Gerempung Main Bol Sarawak (FAS), Datuk Posa Majais.

Taja pia aku pechaya bala pemain udah bebendar bemain tang pengujung iya puntan teulihka pemujur tauka skor.
Tandu Datuk Posa, pendiau padang ti lichin ketegal ujan bangat sebedau main berengkah mega ngachau main malam nya.

Ketegal asal ba main nya ngujungka Sarawak United FC terus ba penuduk pemadu baruh.

Udah tu ila, sida deka besatup enggau tim Negeri Sembilan di Stadium Tuanku Abdul Rahman, Paroi kena 9 Oktober tu ke mega nyadi main kepenudi musin tu.