BINTULU: Menteri Utiliti, Datuk Sri Dr Stephen Rundi Utom andal aplikasyen pintar Sistem Penyidi Elektronik Senapang Patah (e-FATS) deka dikena di selampur nengeri Sarawak.

Rundi madah, aplikasyen tu deka dibantaika raban BTS 2.0 nyerumba Pekit Gerup Kreatif enggau Inovatif (KIK) berserimbai enggau Konvensyen KIK Servis Awam Renggat Nengeri Sarawak ti bepun ari 13 nyentuk 16 Otober.

“Aplikasyen tu dikerembaika raban ari 10 pemesai enggau pengereja ari bemacham gred di Opis Residen Pelilih Bintulu, Opis Pelilih Bintulu, Opis Pelilih Tatau enggau Sebauh.

“Pengawa tu mega ulih mutarka penanggul peminta lisin senapang baru,” ku iya.

Nangkan nya, Rundi ti mega Kaban Kunsil Nengeri (Adun) Kemena nyukung penuh pengeransing raban ti deka ngerembaika aplikasyen e-FATS ti ulih besemekih ba pengawa lumba KIK berserimbai enggau Konvensyen Servis Awam Renggat Nengeri Sarawak jemah.

“Perkara ti beguna amat iya nya kitai ulih ngena aplikasyen e-FATS sereta dikerembai ngagai menua bukai.

“Tu ukai aja ngaul senapang patah tang mega e-profiling sereta ke bukai,” ku iya nyemetak.

Rundi madah munyi nya lebuh meri licha ba pengawa KIK Pelilih Bintulu begulai enggau pengari rayat di sitak Bintulu ba sebuah hotel ditu, kemari.

Berindik enggau nya, Rundi andal Kepala Menteri Datuk Patinggi Abang Johari Tun Openg deka temegah enggau pengawa nya ti seriris enggau visyen nengeri mansang bepelajarka digital.

Ba pengawa bekunsi nya mega, sida temuai ti datai ba aum nya dibantai enggau video, motaj sereta berandauka pekara pelin numbuhka aplikasyen pintar e-FATS ari raban BTS 2.0.

Sama datai Menteri Muda di Opis Kepala Menteri (Undang-Undang enggau Adat Penatai Asal) ti mega Adun Kakus, Datuk John Sikie Tayai, Adun Samalaju, Majang Renggi, Pemesai Khas Kaban Perlimen Bintulu, Azman Abdul Rahman.