SIBU: Pengari Rayat Parti Pesaka Bumiputera Bersatu (PBB) dilalau ngembuan ulah lebih dinamik sereta nyemetak ba pengawa nerangka isu kimpin dikena napi Pengawa Bepilih Nengeri Ke-12 (PRN12).

Speaker Kunsil Nengeri (Dun) enggau Chairman Mendam PBB, Datuk Amar Mohd Asfia Awang Nassar madah, pekara ti beguna amat iya nya mandangka polisi perintah Sarawak, ngenanka polisi enggau mantaika pekara ti udah dijapai Gempung Parti Sarawak (GPS).

“Pekara ti patut dikemeratka GPS iya nya bakani rayat Sarawak peneka bejalaika pengarap sida kelimpah pengelantang rayat dijaga nyengkaum merambu pemansang ti udah dilanchar.

“Ambika chunto, ba pekara nuntut bayar chukai jual nengeri (SST) ti penyampau semak RM3 billion sereta ba lima taun ti deka datai penyampau nya ulih nyadi RM15 bilion lalu belanja nya ungkup pemansang di nengeri tu.

“Nya alai, GPS tu parti ti engkeman dipilih nyadi perintah sampai ke jemah,” ku iya.

Asfia madah munyi nya lebuh meri licha ba pekara randau pengawa bepilih di Konvensyen Khas PBB Zon Tengah di sebuah hotel tebilang ditu, kemari.

Nangkan nya iya madah perengkaguna pemun ti deka dikemeratka ungkup rayat baka bekal ai beresi, karan, jalai alun, sekula sereta duit tambah ari minyak enggau gis nengeri ungkup ngerembaika semua sektor nya.

“Bisi sekeda madah Sempekat Malaysia 1963 (MA63) enda releven, tang di Sarawak pekara nya releven laban ungkup pemaik ba sukut pemansang perengkaguna pemun.

“Pengudah kitai ngulihka belanja ari industri minyak enggau gis, kitai mega ulih meri semua peminta menua enggau kelebih agi rayat,” ku iya nyemetak.

Berebak enggau nya, pekara ti beguna amat diatu iya nya deka meda GPS terus menang ba pengawa bepilih nyentuk pemansang majak chakah di nengeri Sarawak, ku tandu iya.