PRESIDEN Gerempung Main Bol Sarawak (FAS), Datuk Posa Majais dipelaba deka ngererak tusun pemain dalam tim Sarawak udah tu.

Kenu ku iya, pemutus ngaga nyangka digaga pengudah abis main kepenudi ngelaban tim Kuala Lumpur di Stadium Main Bol Kuala Lumpur, Cheras kena 9 Oktober tu.

“Kitai deka ngaga atur lengkas ngererak tim tu ke mungkur dua posisyen iya nya penyerang enggau benteng.

“Pemutus tu mega mesti digaga beduduk ari penuduk tim Sarawak United FC ke majak labuh” ku Datuk Posa madag ngagai Suara Sarawak kemari.

Taja pia, iya madah piak sida deka bemalinka ripot ari ketuai jurulatih (E.Elavarasan) sebedau ngagai sebarang pemutus muai pemain ti enda berapa.

Baka ke udah ditemu ku iya, Sarawak United FC udah enda ulih masuk pekit berebutka Mangkuk Malaysia 2020.

Nya alai ku iya, fokus diatu nguji nempa tim baru dikena napi pekit Liga Malaysia 2021 nengah chara tumu.

“Kitai deka ngatur aum enggau raban jurulatih tim senior pengudah sida nembuka main ngelaban tim kepenudi ila,” ku iya.

Sarawak United FC terus alah (1-0) maya nyatup tim Terengganu FC II di Kuching malam ensana.