Igu Anthony iya nya siku penanyi baruh perabung Kaban Musik Production (KMP) diatu datai baru enggau album baru dikumbai Alah Laban Pengeraja.

Ku iya ti kala tebilang nengah lagu Merampau Beraie sebedau tu,album baru tu ngembuan 10 iti lagu berentak rancak diselit enggau siti dua lagu joget.

“Album tu deka belabuh dijual ba sebelah kedai musik besemak berengkah ba minggu baru tu ila.

“Kelimpah ari aku, raban komposer ke bisi besaup enggau aku ngemujurka album Alah Laban Pengeraja iya nya Duna Ranggau, Hillary , Maxwell Franklin Saran, Wandie Ibrahim enggau Ah Long,”ku iya ngelansa mimit pasal album baru nya.

Berebak enggau nya, ku Igu lagu Dara Saratok ke ditengkebang Ah Long enggau Duna Ranggau dijangka ‘meletup’ ba album serak tu.

ALBUM BARU…Album Alah Laban Pengeraja sempama baka perais ari Igu nuju bala peminat lagu Iban di serata menua.

“Dara Saratok siti lagu berentak Pop disadang ‘meletup’ ketegal ari pemanah tiun enggau leka lagu ditau ngasuh peminat rinduka lagu nya ila.

“Lagu bukai baka Alah Laban Pengeraja, Nuan Berubah, Puni Aku Enda, Semaya Tua, Labu Rendam Puak Kerapa, Joget Puntan Ba Jari Kumang enggau Tawing ujung dunya.

“Tu mih buah jari nuju peminat ti lama udah nganti ‘pemeri’ ari aku ngelama tu.

“Enggau tu mega ngarapka penatai Alah Laban Pengeraja tu ulih ‘ngubat’ pengelengau sida ngagai aku,”ku iya sebedau nutup randau enggau pemberita.

Nya alai, nuju semua bala peminat Igu Anthony tu mih maya kita mandangka sukung ngagai iya nengah chara meli Album Alah Laban Pengeraja sereta iyaka pemadu beguna iya nya beli mih album ti tulin lalu seliahka pengawa nyukung lanun chelak tiru ti balat ngeruga dunya pemerindang lagu Iban.

IGU ANTHONY