SIBU: Sektor betanam betupi menua begunaka orang dagang ti ransing enggau inovatif dalam napi pemansang menua ngagai tikas ke lebih tinggi.

Sapit Kepala Menteri Datuk Amar Douglas Uggah Embas madahka pekara nya amat beguna kelebih agi lebuh Sarawak nagit diri nyadi pengeksport pemakai besai ba taun 2030.

“Menua begunaka mayuh agi orang ti ransing sereta besemangat dalam nyadi pengeluar produk pemakai enggau nambahka bekal pemakai.

“Opis betanam betupi deka mantu orang ti ransing baka tu dalam ngemanahka asil produk pemakai ti dikeluarka sida,” ku iya.

Iya bejaku munyi nya lebuh ngelawa palan ngumpul, proses enggau mungkus asil buah menua tu empu baka rian, dabai, mutan, rian isu, temedak enggau buah bukai di Sarawak Fruit Enterprise ditu, kamari.

Pemungkal serikat buah nya siku pedagang biak Chuo Nang Ling ti gawa nyadi siku elektronik.

Uggah ti mega Menteri Betanam Betupi, Tanah Adat enggau Pemansang Kandang Menua madahka serikat Nang Ling nya ulih nyadi serikat pemun ba Sibu dalam ngeluarka buah baka rian enggau dabai.

Iya mega ngasuh Nang Ling ngemesaika promosyen produk ngagai orang Sarawak ti diau ba Semenanjung Malaysia baka menua Johor.

“Singapura mega ngembuan peranak menua ti mayuh lalu ulih nyadi makit besai nengah bantu Statos enggau opis dagang temuai sereta ulih ngaga kaul enggau kami,” ku iya.

Kenu ku Nang Ling, iya ngepunka dagang nya ba Januari 2018.

Iya ngasilka pemakai beku baka buah, pes buah, buah kachang, buah rangkai, keropok buah, sekelim rian, dabai enggau buah bukai.

Kenu ku iya buah nya dibeli ari pemekal ti bisi bekebun buah ba Ngemah, Bintangor, Julau, Sarikei, Song enggau Stapang.

Produk buah iya lalu dijual ngagai orang di menua tu empu kelimpah ngagai Semenanjung Malaysia.