BINTULU: Penumbuh Inisiatif Skim Pinjau Ngaga Rumah Panjai (SPPRP) ari Perintah Sarawak meri peluang ngagai komuniti menua pesisir kelebih agi peranak di rumah panjai ti deka minta pinjau dikena ngaga enggau nyeleti rumah panjai sida.

Menteri Muda di Opis Kepala Menteri (Undang-Undang enggau Adat Penatai Asal), Datuk John Sikie Tayai madah, pemeri inisiatif tu mandangka perintah Sarawak bebendar deka mantu ungkup pengelantang enggau pengelikun komuniti menua pesisir.

“Pengawa tu deka meri pengelantang ngagai peranak kelebih agi ti deka ngaga rumah panjai baru sida enggau lanchar.

“Naka tu, mayuh peminta pinjau rumah dari sitak Kakus ba taun tu,” ku iya.

Sikie madah munyi nya lebuh meri licha ba pengawa Nyain Sempekat Belanja Rumah Panjai Joseph Mong, Nanga Kakus enggau Kaunsil Pemansang Pengawa Berumah (HDC) ti dipengari Joseph Ronald.

Nangkan nya iya madah ngarap Perintah Sarawak enggau Perintah Besai ulih nambahka belanja pinjau nya ba taun baru awakka lebih mayuh agi peminta ulih dikemendar.

Berindik enggau nya, Sikie madah ba taun tu penyampau enam buah rumah panjai ari Kaunsil Nengeri (Dun) Kakus udah dikemendar pinjau nya enggau penyampau RM3,750,000.

Ba taun tu mega, penyampau 30 pintu peranak ari rumah panjai, Joseph Mong ari Nanga Kakus tu udah bulih pemaik ari skim nya enggau penyampau RM30,000 sepintu, ku iya nyemetak.

“Skim tu udah mayuh mantu enggau meri pengelantang ngagai sida ti sebedau tu semampai nganti pemutus bekaul pinjau rumah panjai nya.

“Terima kasih ngagai HDC laban udah nyediaka bantu Skim Pinjau Ngaga Rumah Panjai ti dibayar baru enggau ungkus ti mimit,” ku tandu iya.

Berebak enggau nya, Sikie mega bisi mantaika geran projek mit menua pesisir (MRP) ti penyampau RM30,000 ngagai Komiti Pemansang enggau Pengelikun Genturung Pendiau (JKKK) Rumah Joseph Mong, Nanga Kakus.