SARIKEI: Penyuntuk belanja ditapi Emerson Rimong Richard Binit iya nya siku nembiak ke benung belajar ba Palan Pematih Pengajar (IPG) Pampang Miri nerima perati ari Tedong Gunda.

Pemenggi AJ Truly Spices Enterprise Tedung Gunda @ Jamal Abdullah udah nyua pemeri duit belanja, laptop, printer enggau keretas A4 ngagai Emerson.

“Arapka pengawa pengasih baka tu ulih ditunda mensia mayuh tauka gerempung ukai dikuasa perintah (NGO) lebih agi bansa Dayak empu awakka nyaup bala ti begunaka bantu.

“Nyadi nengah bantu awakka pengawa pelajar tudah Emerson mujur sereta datai ba adan ke dituju,” ku iya.

Tedung madah munyi nya pengudah nyuaka bantu ngagai Emerson ba lama sebuah hotel ditu, apin lama ke udah.

Berebak enggau nya, Tedung madah pemeri tu ukai ketegal iya bepemisi tang setegal ngasai kediri ngembuan tanggung pengawa ngagai anak bansa diri ti nyulut ba pelajar sida tang napi bemacham penanggul ti ulih nekul semangat sida dalam nyapai juluk ati jemah.

“Berindik ari nya aku ngambi inisiatif neruska pengawa mantu enda milih sesapa laban ngasai utai tu (meri bantu) endang udah nyadi tanggung pengawa ti patut dikereja seagi kitai bisi ngembuan ati ti sinu ke pangan diri.
Emerson ke asal ari Suchong, Lasi,Julau disadang deka kaban Gerempung Pemansang Nembiak Rebak Baru Pakan Julau (PNRB) nengah chara bepupu.

Sebedau tu berita penanggul ditapi Emerson Rimong Richard Binit dikerembai ba media rama maya iya ditemu lemi tulang sereta mua balat puchat ba bilik buding alai iya diau.

Nitihka penerang iya semina bisi duit RM10 diagih kena belanja meli pemakai ungkup timpuh seminggu tauka dua kali aja makai.

Emerson bisi siku agi menyadi lalu diintu aki iya kenyau ari mit lalu semua belanja seduai menyadi nyentuka sekula ditanggung aki iya kediri aja.

Kelimpah ari nya, Emerson mega bisi penanggul ba mata sereta ngembuan Kad Nyelai Pendiau (OKU)