KANOWIT: Peranak menua pesisir di Nanga Ngungun, Ngemah diatu ulih ngasaika pengidup ke lebih manah asil pemansang ti dipejalai Perintah Sarawak.

Adun Ngemah Alexander Vincent madahka ubah rama ekonomi peranak dulu suba ti dikumbai pelilih palan pengentap pendiau baru Rascom nya, nyadi siti pemujur besai perintah meratika pengelikun enggau pengelantang rayat.

Pengudah 50 taun kenu ku iya komuniti ba pelilih nya ngerembai, pia mega rumah panjai enggau peranak dia betambah.

“Enti suba pelilih tu semina ulih ditengah ari perengka pengangkut sungai lalu amat jauh ari pasar Kanowit, diatu Nanga Ngungun udah dikaul enggau jalai alun ti ngasuh pejalai peranak ngulihka servis ti disediaka perintah lebih muntang,” ku iya maya program konvoi motosikal Kepala Menteri ke Kapit, tadi

Kepala Menteri Datuk Patinggi Abang Johari Tun Openg ti nguluka kembara bemutusikal nya sempat singah betemu enggau rayat di Nanga Ngungun.

Berebak enggau nya, Alexander madah entara servis ti disediaka perintah ba pelilih nya baka bekal ai beresi, kuasa karan, klinik pengerai, sekula enggai balai mensia mayuh.

Iya mega madahka, bisi dua projek ti benung digaga iya nya Jalai Bypass Song Kapit enggau stesen betanam betupi.

Ku iya, bisi 24 buah rumah panjai enggau penyampau peranak urung 4,647 iku diau ba pelilih Sekim Pengentap Pendiau Baru (SPS) Nanga Ngungun.

“Tambah penyampau peranak tu udah tentu begunaka mayuh agi perengka infrastruktur enggau servis ungkup pengelantang rayat.

“Aku enggau rayat di pelilih tu pechaya sereta ngembuan pengarap besai ngagai Kepala Menteri enggau Perintah GPS ngambika terus ngemansangka Nanga Ngungun, Nanga Tada, Nanga Jagau, Kabah enggau Ngemah nyadi palan Keluaran Dalam Negara Kasar (GDP) Sarawak enggau meri fokus ngagai sektor betanam betupi komersial,” ku iya.

ALEXANDER VINCENT