KAPIT: Siku lelaki bansa China ti gawa ba taba Tekat Baleh, Putai ditu kemari bebadi nyawa pengudah dituntung penusah enda disadang ba palan iya gawa.

Ketuai Polis Pelilih Kapit, DSP Freddy Bian Stanislaus madah ba penerang ensana (Hari Lima) ngenukuka penusah bebadi nya nyadi ba urung jam 5 lemai Khamis lalu.

“Penusah tu nyadi pengudah deriba lipan peranak Pakistan beumur 33 taun tepawah lalu ninggang tudah niang ti benung meresi parit ba tisi jalai taba nya.

“Tudah niang ke beumur 32 taun dikenukuka parai tekala nya ba palan penusah nyadi,” ku iya.

Freddy madah, piak polis nerima kangau ngenyit nya ari pengaji iya ba jam 6.30 lemai kemari (Hari Lima).

Nangkan nya, deriba lipan nya bisi bakal lalu dibai beperesa ngagai sepital swasta di Sibu.

“Empat iku laki ti nyengkaum tiga peranak Bangladesh enggau siku bansa China sama bisi diripot bakal berindik ari penusah bebadi nya,” ku iya nyemetak.

Bekau ari nya, bangkai niang dibai ngagai Sepital Kapit ungkup bejalaika pengawa pansik.

Kes mega deka dipansik di baruh Seksyen 41 (1) Akta Pengangkutan Jalan (APJ) 1987.