SIBU: “Timbal ari rayat mayuh ngagai Gempung Parti Sarawak (GPS) diatu tau disebut chukup manah, ku Sekretari Besai Parti Pesaka Bumiputera Bersatu (PBB) Datuk Alexander Nanta Linggi.

“Aku pechaya timbal rayat mayuh ngagai GPS chukup positif lalu diterima manah,” ku iya.

Iya bejaku munyi nya ngagai Suara Sarawak maya raptai Konvensyen Khas PBB Zon Tengah ba sebuah hotel ditu, ensana.

Nanta madah maya timpuh tu rayat udah ulih meda pekara ti ulih dipejalai Perintah Sarawak ti diuluka GPS.

“Mayuh perambu pemansang udah dipejalai, bisi udah tembu enggau mayuh agi benung dilanggur ungkup menua Sarawak.

“Nya alai, aku pechaya penyakal benung besemekih enggau kami deka nyadi Perintah Sarawak, sida mega besemaya mai pemansang tang sida bedau nyadi perintah enda baka kami ke sigi udah megai perintah.

“Aku ngarapka enggau pemansang ti udah dijapai, rayat pechaya semua pemansang ti diguna tu ungkup sida,” ku iya.

Iya ti mega Kaban Parlimen Kapit madahka penyakal besemaya ke pekara ti udah digaga sida ngagai rayat ti udah digaga GPS sebedau tu.

“GPS diatu udah mayuh ngaga pemansang enggau ngemajuka Sarawak,” ku iya.

Kenyau 2019 nyentukka diatu GPS udah bediri teguh nyadi Perintah Sarawak ti ngembuan empat parti komponen iya nya PBB, Parti Rakyat Sarawak (PRS), Parti Demokratik Progresif (PDP) enggau Parti Sa’ati Rakyat Sarawak (SUPP).