SIBU: Sarawak nyadi nengeri keterubah ba Malaysia ngembuan stesyen televisyen nasional kediri diberi nama TVSarawak (TVS), ku Datuk Patinggi Abang Johari Tun Openg.

Kepala Menteri mega madah, TVS deka ngidupka baru Pekit Bintang P. Ramlee enggau Pekit Belaban Penemu Trofi Kepala Menteri ti nadai agi diatur dalam beberapa taun ke udah.

Ku iya, kebuah nadai ngatur dua bengkah pekit besai tu beduduk ari perintah ke dipegai Pakatan Harapan sebedau tu nginsil dua bengkah pekit nya.

Abang Johari mega madah TVS deka dipenyadi kena 10 Oktober tu, lalu stesyen nya ila ulih dipeda mensia mayuh nengah Astro channel 122.

“TVS deka ngemuntangka kitai besambung enggau menua luar sereta ngelakukan Sarawak. Kitai mega deka bisi program kediri lalu aku milih 10 Oktober tu ila beserimbai enggau pengerami ngintu Hari Pengada Tuai Pemegai Menua (TYT) Tun Abdul Taib Mahmud,” ku iya.

Iya madah munyi nya rambau Konvensyen Khas Parti Pesaka Bumiputera Bersatu Sarawak (PBB) di sebuah hotel tebilang ditu, kemari.

“Aku madah ngagai Tun minta iya bejadika stesyen televisyen keterubah ari sebuah nengeri di Malaysia dikena ngidupka Pekit Bintang P. Ramlee lalu Tun malas enggau tuchum,” ku iya.

Iya mega ngaku mayuh anak Sarawak ngembuan penau lalu nyadi penanyi tebilang menua baka Dayang Nurfaizah enggau Bob AF, pia mega kitai bisi dara bajik Miss Universe Malaysia 2020 Francisca Luhong James.

“TVS tu mega deka mandangka pengaya main asal ke bisi ba Sarawak lebih agi ke bisi ba sitak Rejang nyentuk ke Sibu nyengkaum mandangka pemanah pua kumbu ngagai dunya luar. Kitai mega deka mandangka adat bansa Melanau, Melayu, Iban, Bidayuh enggau ke bukai.

“Pagila (kemari), pejalai aku ari Sibu ke Kapit ngena motosikal besai deka dipandangka ba TVS laban rampa menua ke manah baka Cape Town (Afrika Selatan). Rampa menua baka tu tau bendar nyadi produk dagang temuai di menua Ulu Rajang,” ku iya.