KUCHING: Sarawak deka nempa sejarah ke diri empu iya nya kena 10 Oktoberi tu ila nyerumba Hari Pengada Tuai Pemegai Menua (TYT) Tun Abdul Taib Mahmud ti ke-84 dia servis TV Sarawak (TVS) deka ngelancharka lalu berengkah ulih dipeda mensia mayuh ba Astro nengah channel 122.

Menteri Kaunsil Kandang Menua enggau Pengawa Berumah ti mega Menteri megai tanggungpengawa nyadi Pengatur Pengerami Hari Pengada TYT Datuk Sri Prof Dr. Sim Kui Hian madahka maya nya ila pejalai pengerami ngintu Hari Pengada TYT deka dipandangka terus nengah TVS.

“TVS bepun ulih dipeda ba Astro nengah chanel 122 lalu deka dipenyadika TYT empu ba Pengerami Ngirup Lemai di Hotel Waterfront kena 11 Oktober.

“Pemansut TVS tu nyadi tanda ti besai ngagai Sarawak sereta patut dikemegahka semua rayat menua tu,” ku iya.
Kui Hian madah munyi nya ba aum pemberita Pengerami Ngintu Hari Pengada TYT ke-84 di Wisma Bapa Malaysia ditu, kemari.

Kenu ku iya, Hari Pengada TYT tu diintu sepengelama tiga hari di Kuching belabuh 9 Oktober nyentukka 11 Oktober.
“Pengerami deka dipungkal enggau sembiang makai selamat kena 9 Oktober ba Mesegit India.

“TYT deka diuluka bini iya empu Toh Puan Datuk Patinggi Raghad Kurdi Taib lalu disempulang Kepala Menteri Datuk Patinggi Abang Johari Tun Openg enggau bini Datin Patinggi Jumaa’ni Tun Tuanku Bujang,” ku iya.

Tandu Kui Hian, udah besembiang TYT deka meresa baris beradat ti diatur ba Kunsil Nengeri (Dun).

“Ba pengawa nya mega senapang deka ditimbakka 17 kali tanda meri basa ngagai iya kelimpah lagu Nengeri Sarawak sereta mayuh program bukai.

“Ngalihka malam, TYT enggau Kepala Menteri deka datai ngulu pengerami makai lemai ba Balai Banquet Dun ti diperindang penanyi tebilang, betanda, melah kek, video enggau pengawa bukai.

“Ba hari ti kepenudi kena 11 Oktober, kelimpah bejadika TVS, TYT deka meri mata duit ngagai raban gawa di luan dikena meri tanda terima kasih ngagai sida ti udah bebendar ngelaban pengerekai igi penyakit Covid-19” ku iya.

Berebak enggau nya, Kui Hian madahka pengawa ngintu Hari Pengada TYT taun ti bisi bebida laban diintu ngena chara baru.

Ungkup penerang, Abdul Taib dipadu nyadi TYT Sarawak ti ketujuh kena 1 March 2014.