SIBU: Perintah Sarawak nengah Gempung Parti Sarawak (GPS) deka ransing agi bejalaika projek utiliti di selampur Sarawak enggau nambah belanja nya penyampau RM212 billion, ku Menteri Utiliti, Datuk Stephen Rundi Utom.

Rundi madah, ba kandang menua pesisir naka diatu agi mayuh bedau bulih bekal ai iya nya lebih 65.5 peratus.

“Ba kandang mengeri urung 99 peratus udah bulih bekal ai, tang ba zon Sibu ditu empu semina 77 peratus ti bulih bekal ai tu.

“Ti nitihka peratus nya, piak menteri deka tauka benung merambu sereta andal peratus nya deka berubah lebih positif ba timpuh ti deka datai,” ku iya.

Rundi madah munyi nya lebuh mantaika keretas kereja Bekunsi Strategik Projek Utiliti Bekal Elekterik enggau Bekal Ai Bersi di Menua Pesisir ba rambau Konvensyen Khas PBB Zon Tengah ba sebuah hotel tebilag ditu, ensana.

Nangkan nya iya madah ba Langgur Pemansang Malaysia Ke-12 (RMK12) bisi 54 projek diperambu enggau peyampau ungkus RM4.34 billion ungkup Zon Sibu.

“Naka 23 September taun tu aja lebih 234 projek utiliti di Zon Sibu diberi agih belanja penyampau RM1.38 billion.

“Projek nya dipejalai nengah lima kaunsil pelaksana baka ‘Sarawak Alternative Rural Water’ (Sawas), Opis Menteri Pemansang Menua Pesisir (KPLB), Projek Tekat bah (RTB), Projek Nengeri enggau Projek Rayat.

“Ungkup grid ai di Sibu, bisi semilan grid ti udah dikemansang nyentuk seharitu,” ku iya.

Berebak enggau nya, bisi sekeda projek ti udah dipejalai puntan ketegal pengerekai igi penyakit Covid-19, nyadi projek nya deka dipejalai baru ba taun 2021.

Ungkup diatu nengah semilan buah grid ai ti bisi di Sarawak baka ‘Loji Rawatan Air Salim’ di Mukah deka disambung ngagai Selangau enggau genturung loji kebukai, ku iya nyemetak.

“Pengudah ‘loji rawatan’ ai tu tembu enggau lengkap digaga ila, penanggul ai deka nadai agi ,” ku tandu iya.

Ungkup bekal elekterik ari taun 2009 nyentuk 2019 perintah Sarawak udah melanja penyampau RM2.7 juta ungkup pemansang elekterik ketebal agi di genturung ti nadai bulih kuasa karan nya.

Nya alai perengkaguna pemun tu beguna amat dikemansang ngambi penuduk GPS tegap agi nengah kerejasama ari semua piak ti deka terus meri sukung ngagai GPS.

“Aku mega ngelalau ti bisi komuniti Sarawak napi penanggul utiliti, kitai anang nyadika isu nya nyadi siti isu politik.

“Ti pekara nya bisi nyadi, pengawa ukum deka dipejalai ngagai sida. Nya alai, putarka sebarang isu nya enggau manah,” ku lalau iya.