SIBU: “Beri mandat baru ngagai GPS, gawa mih bebendar.” Pia ku jaku Kepala Menteri Datuk Patinggi Abang Johari Tun Openg meransang bala kaban Parti Pesaka Bumiputera Bersatu (PBB) dalam nentuka pemujur parti nya.

Abang Johari ti mega Presiden PBB minta semua kaban parti tegap begulai dalam siti semangat ngetanka hak Sarawak enggau rayat sekali.

Berebak enggau nya iya mega pechaya kaban PBB ngembuan pengeransing ti tinggi sereta lurus ba pengawa diri empu.

“Kitai beterima kasih enggau meri basa ngagai ketuai ti udah dulu ti udah mujur ngetanka PBB. Diatu kitai napi jeman baru enggau ngiga tuju ti baru, awakka semangat enggau juluk PBB sebaka enggau juluk anak Sarawak jeman diatu,” ku iya maya Konvensyen Khas PBB Zon Tengah Sarawak, ensana.

Iya madahka, PBB tegap enggau ngeletakka peminta pemun nengah jalai ti betul seriris enggau pengawa parti nya nyadi tulang belakang ngurus enggau ngemansangka Sarawak.

Kenu ku iya, nyadi serak ti deka nampung pengawa ketuai ti dulu, raban PBB maya tu mesti lebih dinamik dikena nangkup juluk ati rayat Sarawak kelebih agi Bumiputera.

“Kaban PBB patut terus ngingatka juluk negika hak Sarawak baka ti disebut ba Konstitusyen Perintah Besai, Sempekat Malaysia 1963 enggau Ripot IGC patut dipebasa enggau dipejalai ba pematut.

“Penyerakup kitai dalam parti patut nyadi tiang pandung dalam negapka PBB awakka mengkang relevan. Aku ngarapka konvensyen tu meri tuju ti nyata ngagai juluk besai parti,” ku iya.

Abang Johari madah, iya ngambi perati serius ngagai semua mosyen ti dibantai nyengkaum isu pelajar awakka nasip pelajar anak Sarawak dijaga.

“Lebuh anak kitai belajar ba renggat ti lebih tinggi baka ngambi setipikit tauka degree, maya nya sida begunaka belanja. Nya alai, aku benung berunding deka meri RM300 nyentuk RM1,000 ngagai sida.

“Tu chara kitai nulung orang. Kitai meri RM1,000 ngagai tiap iku nembiak mit ti baru ada bepun tau siti nyin kemari enda ngira berapa iku penyampau nembiak dalam ruang bilik nya. Pia mega, kitai mantu indai lebuh sida dalam pantang ungkup meli barang anak penyampau RM450 dalam timpuh tiga bulan. Kitai mega meri bantu pemati penyampau RM3,000 dikena nguruska bangkai. Nyadi, ari nembiak ti baru ada nyentukka midang, Perintah GPS mantu rayat.

“Nya bantu ti diberi kitai ari sukut pengelantang pendiau. Aku ngembuan siti pelasar. Enti kitai besedekah, rejeki kitai deka betambah. Paling nadai dalam timpuh tiga taun rejeki kitai deka betambah. Nya alai beri mandat ngagai aku lima taun agi, aku pechaya rejeki kita betambah,” ku iya.

Berebak enggau nya, iya ngingatka semua kaban PBB ngambika besedia ngetanka parti awakka ulih nyambung ‘perjuangan’ parti ungkup rayat.

“Aku semina bepesan. Aku enda nemu kemaya pengawa bepilih besai nengeri deka diatur. Tang, diatu kitai besedia malu ‘bedok’. Maya ‘bedok’ bemunyi, kitai sama nurun ngetanka PBB enggau GPS. Endang maya tu mayuh musim (politik) tang GPS endang sebuah parti ti ngembuan peneleba nguruska nengeri,” ku iya.

Sama datai Sapit Kepala Menteri ti mega Sapit Presiden PBB Datuk Amar Douglas Uggah Embas enggau Datuk Amar Awang Tengah Ali Hasan, Sekretari Besai Parti PBB Datuk Alexander Nanta Linggi sereta urung 1,083 iku pengari PBB Zon Tengah ari 25 pampang.