KAPIT: Bagi menua Kapit ngembuan penau besai ba sektor dagang temuai enti dikerembai enggau manah ba nengeri tu.

Ketuai Menteri Sarawak, Datuk Patinggi Abang Johari Tun Openg madah Kapit ngembuan landskap ti manah alai ngaga filem.

“Sepemanjai aku deriba motosikal tadi aku mayuh meratika rampa menua Kapit, chukup manah lalu tau matak temuai ari luar datai nemuai kitu,”

“Palan baka tu tau nyadi alai endur ngaga filem baka ba menua Korea ti udah tebilang laban cherita Winter Sonata suba pia mega Kapit ulih mai nama Sarawak ngagai menua bukai ila,”

Abang Johari madah munyi tu lebuh ngulu Pengerami Makai Lemai beserimbai enggau Pejalai Konvoi Ngena Motosikal Nengah Jalai Sibu Kapit ba Dewan Suarah ditu, malam tadi.

Ku iya, sepenyampau 100 buah motosikal nyereta pengawa bemotosikal tu sereta sida iya mayuh alit ati meda pemanah rampa menua Kapit.

“Aku tekenyit meda jalai kiba enggau kanan mayuh bukit ti tinggi enda nyalah baka jalai ba Cape Town, Afrika,” ku iya

Pengari rayat ditu mega dipuji iya laban besaup entara pangan diri ngulihka projek ngaga jalai tu ungkup penyenang rayat ditu.

“Tu mih bida iya dulu enggau diatu, enti dulu sepengelama tujuh jam nepan kapal Zahora lebuh maya aku enggau apai ku ngelawa Kapit tang diatu semina sejam lebih aja ari Sibu ke Kapit,”ku Abang Johari

Sama bisi datai , Sapit Kepala Menteri Datuk Amar Tan Sri Datuk Amar Dr James Jemut Masing,Menteri Dagang Dalam Menua enggau Pekara Penguna (KPDNHEP), Datuk Alexander Nanta Linggi enggau temuai ke bukai.