KAPIT: Kapit ukai agi nyadi pulau dalam Pulau Borneo laban diatu ulih disambung enggau jalai Sibu-Kapit penyauh 110 kilometer lalu terus disambung ngagai selampur Sarawak, pia ku Sapit Kepala Menteri Tan Seri Dr James Jemut Masing.

Ku Masing, Kapit diatu ulih dilawa pengudah disikap jalai alun kelimpah udah ngemandakka timpuh pejalai ari Sibu ke Kapit dibanding suba.

“Dikena nunjukka jalai alun tu udah digaga, Kepala Menteri Datuk Patinggi Abang Johari Tun Openg udah bejalai semina ngena motosikal aja ngambi nunjuk ngagai semua ti mejahh, iya udah bejalai ari Sibu ngagai Kapit.

“Terima kasih Kepala Menteri, iya udah mantaika nadai siku orang deka mejah madahka Kapit nadai datai jalai,” ku Masing.

Masing mansutka jaku nya ba Pengerami Makai Lemai ba Civic Centre Kapit, Hari Minggu tu tadi.

Iya mega meri besai terima kasih ngagai Abang Johari laban pintar ngiga belanja ngambi ulih dikena ngemansangka Kapit enggau bagi menua bukai ba menua tu.

“Pengudah 57 taun Merdeka, kitai apin bisi jalai alun.

“Aku enggau pengari rayat bukai nyengkaum Kaban Parlimen Kapit Datuk Alexander Nanta Linggi suah minta agih belanja ngambi diagih ngagai kitai.

“Kamie udah minta ari Datuk Seri Shafie Apdal maya iya agi nyadi Menteri Pemansang Menua Pesisir.

“Iya besemaya deka meri agih belanja ngagai kitai tang pekara nya nyadi sebedau Barisan Nasional (BN) alah lebuh Pengawa Bepilih Besai Ke-14 (PRU14) ngujungka kitai nadai nerima agih belanja nya,” ku Masing ngelansa.

Masing ti mega Adun Baleh madah iya berasai lantang ati laban Kepala Menteri deka ngagihka belanja dikena mutarka projek Jalai Sibu-Kapit.

“Abang Johari udah nyuaka agih belanja dikena ngemansangka Kapit ukai semina ungkup projek jalai alun tang mega ungkup nyendiaka bekal ai enggau kuasa karan,” tandu iya.

Iya mega madahka Abang Johari setuju ngemendar agih belanja RM58 juta ungkup pemansang projek rampa menua enggau pesaka asal nitihka peminta iya.

Udah nya, Masing ningkah penemu Parti Sarawak Bersatu (PSB) ti madahka iya nadai mai pemansang ke Kapit.

“Nya penemu ti salah lalu anang ngachau kami enggau penemu baka nya.

“Padah aja pekara ke amat nyadi enti kita deka ngelaban Gempung Parti Sarawak (GPS), anang landik nempa jaku bula sebedau kita nyadi perintah ke diatu.

“Semua jematan enggau jalai ke suah ditengah kita nuju Tunoh nya digaga Perintah Sarawak.

“Nya alai, anang bula enggau ngemaruh orang bukai ketegal deka bekuasa,” ku Masing nyemetak.