KAPIT: Perintah Sarawak deka nempa Kapit nyadi sebengkah ari palan endur ngaga filem dikena ngelakuka menua Kapit ngagai dunya luar nengah stesyen televisyen nasional pemadu baru Sarawak, TV Sarawak (TVS).

Kepala Menteri Datuk Patinggi Abang Johari Tun Openg madah munyi nya pengudah beratika pemanah rampa menua Kapit lebuh ti neresa pejalai nengah jalai alum baru ari Sibu ke Kapit maya ngena motosikal besai bebala mayuh kemari.

“Nyadi, aku udah madah ngagai Menteri Dagang Temuai, Seni enggau Main Asal, Datuk Abdul Karim Rahman Hamzah kitai deka mandangka pemanah rampa menua di Kapit tu ba TV kitai (TVS).

“Kedua, nyangka kitai deka nganggauka penengkebang filem ke Kapit lalu ngaga filem mandangka pemanah rampa menua ditu,” ku iya rambau bejadika Kapit Town Square ditu kemari.

Iya mega madah pekara ke lebih manah enti filem ke digaga nya nengah TVS mandangka pasal bujang berani ari Kapit laban nya ulih nyeritaka sejarah Kapit.

“Aku deka madah munyi nya diatu laban Sarawak deka bisi stesyen TV kediri. Aku mega udah minta Tuai Pemegai Menua (TYT) Sarawak, Tun Pehin Sri Abdul Taib Mahmud bejadika TVS kena 10 Oktober tu, lalu mensia mayuh ulih meda iya nengah Astro ba channel 122,” ku iya.

Kelimpah ari nya, pemisi TVS nya ku iya ngujungka pengawa seni enggau main asal Sarawak ulih dipandang enggau dikerembai ngagai orang bukai ba luar Sarawak.

“Ari TVS tu, kitai mega ulih bekunsi penemu enggau orang luar,” ku iya.

Bela bisi datai Sapit Kepala Menteri, Tan Sri James Jemut Masing, Menteri Dagang Dalam Menua enggau Pekara Penguna Datuk Alexander Nanta Linggi, Menteri Dagang Temuai, Seni enggau Main Asal Datuk Abdul Karim Rahman Hamzah, Sekretari Perintah Sarawak Datuk Amar Jaul Samion, bala menteri muda, pengari rayat, tuai raban bansa enggau ke bukai.