DEBAK: Genap pekebun mesti nambahka penemu diri sentang chara betanam enggau nyaga utai tanam ngambika semua utai tanam mansutka asil ti ngemantup ati.

Sapit Kepala Menteri Datuk Amar Douglas Uggah Embas madah, nya entara batang tuju Program Betanam Betupi Ngaul Komuniti (AgriCOP) dipejalai ba menua tu.

“Kebuah pia laban Sarawak deka nyadi palan tibang pemakai.

“Nya kebuah, aku minta Opis Betanam Betupi ngiri penemu ngagai komuniti kelebih agi pekebun sentang chara nentuka utai tanam dikemansang sida mansutka mayuh asil.

“Ambika banding, sebedau tu rian semina mansutka 20 igi buah.

“Nya alai nengah Program AgriCOP tu, pekebun diajar chara nanam enggau nyaga rian dataika ulih mansutka mayuh buah.

“Sama mega enggau utai tanam bukai ngambika pekebun ulih nambahka penatai pemisi sida nengah pengawa betanam betupi,” terang iya.

Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka jaku nya lebuh bejadika Program AgriCOP Bagi Menua Betong Renggat 7/2020 diatur Opis Betanam Betupi ba Rumah Kamarau Changgan, Munggu Prin, ditu tadi.