KANOWIT: Pengeransing Perintah Sarawak dalam bejalaika agenda pemansang mujur ngubah menua Kanowit nyentuk ke Kapit.

Kepala Menteri Datuk Patinggi Abang Johari Tun Openg madahka penatai jalai alun ti ngaul kededua pelilih tu nyadi tanda pemujur besai perintah dalam nyendiaka perengka guna pemun ti diguna rayat.

Enti kelia, jalai kededua pelilih tu amat mar laban semina bepanggai ngagai sungai tang pekara nya deka berubah enda lama agi.

“Suba ngelawa Sibu mar mimit laban nadai jalai alun tang diatu udah bebida. Pemansut jalai darat ti moden sereta lantang deka ngemuntangka pengawa ninting hari peranak genturung pendiau.

“Tu siti pemujur besai, udah bisi jalai alun. Tu mega pemansang ti dibai kitai lalu pemansang tu enda ngetu ditu aja,” ku iya lebuh bejaku ba program begulai rayat di Balai Mensia Mayuh JKKK Nanga Ngungun Kanowit, kemari.

Iya madahka, pemansang deka diteruska nyentuk pelilih bukai ti nyengkaum bemacham infrastruktur kemaya hari nyengkaum jematan di Nanga Mujong, ngaga jalai ke Baleh enggau Belaga nyentuk ke Bintulu.

Projek ti meri empas besai nya kenu ku iya deka ngasuh selampur pelilih zon tengah Sarawak ngembuan jalai alun maya udah tembu ila.

“Aku datai kitu, laban aku deka meda enggau mata aku empu laban bisi orang meri gambar bemacham-macham. Tang diatu kitai udah ngaul semua jalai ke putus nya. Taja pia jalai kaul ke Kapit bedau tembu penuh.

“Aku minta piak ti bekaul ngaga jadual baru dikena ngemuntangka penguna kelimpah nentuka projek ngaga jalai tu ulih diteruska. Bisi maya kitai ngetu ngaga jalai enggau bisi maya kitai muka jalai nya ke guna penguna. Mesti atur manah,” ku iya.

Ba penemuai sekali tu beserimbai enggau kembara mutusikal ke Kapit, Abang Johari ngemendarka penumbuh balai mensia mayuh ungkup guna peranak di Nanga Ngungun.

“Peminta bukai aku deka berunding dulu. Kitai ngaga balai dulu. Enti NCR bisi ditu, engka kitai deka nyukat enggau magi surat pala tanah. Inisiatif tu sebagi ari pengawa nambahka pemansang pelilih tu ba sektor betanam betupi. Tang kitai mesti nyukat dulu sereta ngelala status NCR tanah nya,” ku iya.

Sama bisi datai Sapit Kepala Menteri Tan Sri Datuk Amar James Jemut Masing, Adun Ngemah Alexander Vincent enggau ke bukai.