Tiap iku kitai tentu kala berunding lalu ingatka pemanah enggau penyamai diau ba menua asal diri empu kelebih agi lebuh belelang jauh tauka lama gawa ba mengeri.

Pia mega ditambahka enggau gaya dunya ti enda tentu menuku ketegal pangka penyakit Covid-19, udah tentu mayuh bala kitai ingin deka ngasaika penyamai dampih enggau apai indai, bala menyadi sereta kaban belayan ti lama udah enda enggau betemu.

Semua orang nemu gaya pengidup diau di rumah panjai tau ngasuh ati kitai lantang laban palan nya meh endur kitai besai.

Pekara tu ngasuh ati aku sinu ngenangka diri lelang ngagai mengeri ningalka bala apai indai ngiga rejeki dikena neruska pengidup.

Ngelansa mimit sentang menua aku iya nya Kampung Long Tepen, Pelutan di pelilih Baram ke diuan majoriti bansa Penan.

PELAJAR…Nitih cherita orang tuai Penan di Long Tepen bepun nemu nyurat kenyau taun 1960-an kelia.

Rayat ti diau dia nyauka semua udah ngemeranka pengarap Kristian (SIB) kenyau pun taun 1950-an lalu pengidup sida diau mendam berumah semak tebing tasik Sungai Pelutan, Baram.

Nitihka tumpuk geografi, genturung pendiau tu berimbai enggau bansa Kayan di Baram nyengkaum Long Miri, Long Pilah enggau kampung bukai.

Aku pechaya mayuh orang bedau nemu dalam agi pasal pemansang enggau chara pengidup bansa Penan maya kelia enggau diatu.

Asil tu nyata lebuh mayuh ti ngumbai bansa primitif Bumi Kenyalang agi nguan adat enggau chara bepindah ti digaga sebedau tu.

NEMU NYURAT BEPUN TAUN 1960

ADAT…Adat makai beserumpu mengkang dikemeranka bansa Penan di Pelutan.

Nitihka cherita siku peranak ditu iya nya Guro Keling, peranak ditu dulu kelia bepun nemu nyurat tauka bulih pelajar pun taun 1960-an.

Taja pia, peranak kampung maya nya bedau sedarka pemesai guna pelajar ti ulih ngubah tikas pengidup ruang bilik enggau bansa sida.

Maya nya sida lebih meri fokus ngiga asil kampung nyadi barang pemakai enggau penatai pemisi sida maya nya.

Taja enda ngambi perati ngagai isu pelajar maya nya, tang sida tetap meransang bala anak ke sekula taja enda nitih penuh atur sekula ti udah ditetapka piak sekula.

Pekara nya lalu ngasuh ubah mimit bisi ngerembai ari sukut runding peranak kampung dalam ngubah chara sida seriris enggau pemansang jeman.

BERIPAI…Guro Keling (kanan) begulai enggau sida serumah ngaduka perengka dikena mela pemakai rambau program makai beserupu di karangan.

Pelaba aku, maya nya agi bisi sekeda bala bansa Penan agi ngemeranka pengidup bedampa (suah pindah) tang bisi mega sida ti diau mendam ba genturung pendiau nya.

Pia mega, peranak ba kampung maya nya udah sedar enggau pekara pelajar ti ulih ngubah pengidup ti lebih manah.

Taja diau jauh ba menua pesisir, bansa Penan di rumah panjai agi tetap bebendar nyengulaka anak sida nyentukka renggat ti pemadu tinggi baka bansa bukai.

Pekara tu nyemetak dipeda ba genturung pendiau mujur nempa sekeda nembiak udah nyulut ba Ujian Penilaian Sekolah Rendah (UPSR), Sijil Pelajaran Malaysia (SPM) enggau nembiak ti pansut ari Palan Pelajar Tinggi (IPT).

ADAT BANSA PENAN

RUMAH PANJAI…Kampung Long Tepen, Pelutan mengkang randaka pemansang ari perintah.

Sebaka enggau bansa bukai, bansa Penan dikelala sebagi ari etnik ti ngembuan adat sereta penyelai.

Nya nyengkaum chara dalam nyaga kaul, penyelai keresa muzik, pekayan, pemakai asal, pengerami enggau ke bukai.

Nyentukka diatu agi mayuh adat enggau chara lama mengkang dikemeranka bansa Penan ditu dalam pengidup sida ninting hari, sekeda ari nya baka chara ‘kuman pelung’ tauka ‘kuman pemung/kuak’ enggau ke bukai.

‘Kuman pelung’ bereti pengawa makai serumpu begulai enggau diri sebilik sereta bala kaban ti lama enda betemu.

Adat tu mesti digaga nyadi tanda bebasaka entara siku enggau ke bukai kelimpah bekunsi jereki ti diulih sebuah ruang bilik.

Tebal agi ruang bilik ti bekaul deka mai kediri pemakai ari rumah diri empu dikena begempuru maya nya.

Chara tu mega nyadi situ tanda dikena ngerapitka kaul enggau penyerakup dalam bansa sida dia.

Ulah bekunsi rejeki mega siti adat ti mengkang dijaga nyentukka diatu laban nya lambang adat asal ti diturunka aki ini bansa Penan kelia.

Ku jerita, adat tu digaga laban pemar ti ditapi bansa Penan menya dalam pengidup sida ninting hari.

BEKUNSI BEREKAT

KENANG…Gambar lama meruan nyadi pengingat manis penulis maya agi jeman anak mit kelia.

Bansa Penan nyau bekunsi pemakai tauka berekat ari Tuhan dikena ngisi perut taja pan penyampau pemakai nya mimit dikena neruska pengidup.

Pelasar ti terus dipegai nyentukka diatu lalu diturunka ngagai bala anak awakka terus ngenang adat ti ditinggalka aki ini sida kelia.

Taja agi ngembuan adat lama, pekara nya nadai nagang peranak ditu bulih pemansang ti disediaka perintah.

Nya ngujungka peranak ditu ngelaluka penatai bantu enggau inisiatif ari perintah ngambika bansa Penan di semua sitak ulih mansang seriris jeman diatu.

Ngarapka kampung tu terus mansang maju enggau ulih negapka semangat sekada bansa Penan ti agi tinggal sereta kurang penemu pasal pemansang.