SIBU: Kepala Menteri, Datuk Patinggi Abang Johari Tun Openg madah, Sarawak deka bebendar ngemanahka polisi kayu batang ke bisi diatu dikena ngetanka pemanah rampa menua enggau nagang ulah enda mereti piak ti nguji ngelanggar adat.

“Nama utai ke diperambu iya nya kitai deka beratika baru polisi ke udah bisi bekaul enggau pengawa nebang kayu batang, endang udah bisi polisi, nyangka deka ditambah manah agi. Kebuah pia laban utai dikemerat diatu iya nya pengawa nanam baru kampung enggau berundingka industri nebang kayu.

“Entara atur dikena mutar iya nya nanam baru kayu lebih agi kayu getah, enti ba sitak ulu Rajang tu, ambika chunto sida ke mayuh tanah NCR, nyangka ulih meri peransang dikena bejalaika insentif betanam betupi komuniti.

“Berebak enggau nya mega kitai deka mansik perambu tu ari mayuh sukut nyengkaum ordinan, piak vekaul enggau atur ngintu tanah ke pemaik rampa menua.

“Tu deka diperundingka kitai. Nya alai kitai bisi Kaunsil Pengereja Pengawa Ekonomi Sarawakti deka mansik pekara tu nyengkaum ari sukut palan besemak enggau rampa menua,” ku iya rambau i Konvensyen Khas PBB Zon Tengah ditu, ensana.

Iya mega madah, perintah mega merambu deka numbuhka Kaunsil Tasik awakka nyaga enggau ngintu kandang tasik di nengeri tu.

Inisiatif tu ku iya seriris enggau juluk ngetanka pemanah rampa menua enggau nyungka pengawa dagang temuai Sarawak.

“Atur tu kebendar digaga ba menua barat baka New Zealand. Ari kaunsil tu, kitai deka ulih ngintu semua tasik ari mayuh sukut nyengkaum pengelikun. Pia mega, bisi sekeda zon enda ulih dikemansang hotel enggau resort. Tu perambu kitai ungkup lima taun deka datai tang diatu benung dalam pansik,” ku iya.