SIBU: Ketuai Polis Pelilih Sibu, ACP Stanley Jonathan Ringgit ngasaika pemati siku indu ke alai bangkai niang ditemu ba Jalai Aman pagi kemari ngasuh kitai alit ati.

Ku iya, mayuh pekara mesti diperati enggau dipansik pasal kes ke nyadi nya.

“Indu nya dipelaba beumur 37 taun lalu kami melaba niang parai ba endur bukai lalu dibuai kia begulai enggau gari dipelaba gari tudah empu.

“Tubuh iya nadai bakal enggau nadai sebarang bekau kena jamah tauka senyata ditemu ba endur penusah nyadi.

“Semina setengah tubuh indu nya aja ulih disegul dalam kantung gari nya lebuh kami datai dia.

“Niang tu besai tubuh. Nya kebuah setengah tubuh iya enda ulih disegul apus ke dalam kantung,” terang Stanley lebuh dirandau tadi.

Dua surat ditulis jari ngena jaku China nya ditemu semak bangkai niang.

Siti ari surat nya ngundan lumur tingki nunjukka iya asal ari kod nengeri ‘08’.