KUCHING: Komiti Penyangga Penusah Ngenyit Nengeri (JPBN) Sarawak madahka menua tu ngerikod tiga kes baru positif Covid-19 ba Pelilih Kuching, Miri enggau Sibu.

Chairman iya, Datuk Amar Douglas Uggah Embas madah, tiga kes baru dirikod tu ngujungka kes Covid-19 ba Sarawak nambah 721 kes.

Nadai kes baru ti udah suman enggau dikemendar pansut ari sepital ngujungka rikod mengkang 683 iku tauka 94.73 peratus naka sehari tu.

Kes ti agi diperubat ba wad isolasyen nambah tiga kes ngujungka bisi semilan kes ba SGH, Sepital Miri (6), Sepital Sibu (3) enggau siti kes ba Sepital Bintulu.

Lima PUI baru dirikod sehari tu enggau kes pemati mengkang 19 iku tauka 2.64 peratus.