KUCHING: Kuching Skills College (KSC) benung ngatur Latih Bedagang enggau Ngenegap Orang Indu Sarawak (SWEET) ungkup raban B40.

Ketuai Pemesai Eksekutif iya, Novert Sullang madah, latih pechuma pengelama 17 hari nya diatur berengkah 1 nyentuk 18 Oktober tu digulu 50 iku penyereta.

Ku iya, tuju latih nya dikena meri peluang ngagai raban diselinting belajar enggau ngansah pengelandik diguna sida nyengkaum penemu ba industri kuliner tauka mela pemakai enggau bedagang.

“Munyi ku jaku sempama, enti kitai meri ikan siku ngagai lelaki nya, kitai semina ulih meri iya pemakai ungkup sehari nya aja tang enti kitai ngajar iya nginti, lelaki nya deka bulih pemakai seumur idup iya.

“Reti iya, kitai nyikap raban indu datai ari ruang bilik seranta ngena penemu enggau pengelandik ti diguna dalam pengidup besehari-sehari ngambika sida enda kelalu ngandalka bantu diberi perintah.

RANSING… Bala penyereta mela pemakai nunda utai udah dipelajar.

“Sida tu mega deka ulih ngemajuka diri ba dagang lalu mansutka diri ari perekuh penyeranta dudi hari, tu fokus besai kami,” ku iya lebuh dirandau Suara Sarawak, kemari.

Novert madah, kuliner tauka mela pemakai tu tau dikumbai kitai seni ti patut dikuasa kitai empu lalu ulih nerenak ulah rinduka pengawa ngintu enggau bebelaka pemakai.

Sida ti berengkah rinduka pengawa tu deka bisi ati angkun enggau ransing agi maju ba dagang, nunda orang ke udah dulu nyulut ba industri dagang pemakai.

NGENEGAP LATIH PENGELANDIK… Novert Sullang

“Juluk kitai deka ngubah runding enggau peragam senentang dagang pemakai ngambika sida nemu mayuh pengulih dikena ngemansangka diri ba industri tu.

“Engka tu sebagi ari peneleba baru ari mayuh macham penemu dipelajar, berengkah ari mela pemakai dataika diajar chara ngelagu pemakai ti dinah, semua tu bisi guna lebuh ngelakuka dagang.

“Enti deka maju ba dagang, kitai enda tau sesekali ngereja pengawa semina deka ngudahka utai aja, tang patut ngena pemakai nya matak orang datai baru meli pemakai dijual kitai,” terang Novert lenak.

Nambahka nya, latih tu setipak enggau agenda Perintah Sarawak ngurangka penyampau raban B40 enggau meransang mayuh agi raban nembiak ngepunka dagang sida empu.

Program latih kuliner tu kebendar ditibak ari penemu Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Sarawak, Datuk Seri Fatimah Abdullah.

Ku Novert, sebedau tu mega mayuh program, kus, seminar enggau latih ngaul orang indu B40 baka indai tunggal kala diatur kolej sida enggau tuju ke sama, meri raban nya peluang ngemajuka diri.

“Nengah latih baka tu, bala penyereta diajar pasal chara mela pemakai ti likun enggau beresi sereta landik ngatur dagang lebuh muka dagang diri empu jemah.

“Tu mih peluang kena berubah ngulihka pengidup ti menyana agi laban Kuching Skills College semampai meri awak ngagai sida nyungkak ekonomi nengah dagang,” ku Novert madah nyemetak.

NEMPA PEDAGANG LANDIK… Bala penyereta nyinuk mendingka penerang ari pengajar sida.